ភ្នំពេញ៖ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានបញ្ជាក់ថា ការ​ផ្លាស់ប្តូររថយន្តដឹកកម្មករនិយោជិតឱ្យស្របតាមបទដ្ឋានបច្ចេកទេស និងផាសុកភាព គឺជាការ​គិតគូរ​ដែល​រាជរដ្ឋាភិបាលនឹងជួយទៅដល់កម្មករនិយោជិត ឱ្យធ្វើដំណើរប្រកបដោយផាសុកភាព និងស្រប​តាមបទដ្ឋានបច្ចេកទេស ហើយអ្នកប្រកបរបរដឹកជញ្ជូន ក៏នឹងមិនប៉ះពាល់​ដល់​ចំណូល​ផង​ដែរ​។

ក្នុងពិធីបើកសិក្ខាសាលាស្តីពី “ការជំរុញការផ្លាស់ប្តូររថយន្តដឹកកម្មករនិយោជិត​ឱ្យ​ស្រប​តាម​បទ​ដ្ឋាន​បច្ចេកទេស និងផាសុកភាព” នៅព្រឹកថ្ងៃទី២៩ ឧសភា ឆ្នាំ២០២៤នេះ ឯកឧត្តមរដ្ឋមន្ត្រី បានស្នើឱ្យអង្គពិធីប្រមូលធាតុចូលពីគ្រប់ភាគីពាក់ព័ន្ធ ដែលមានទាំងកម្មករនិយោជិត និយោជក អ្នក​ប្រកបរបរដឹកជញ្ជូន និងអង្គការដៃគូ ដើម្បីធានា​ការ​ផ្លាស់ប្តូរ​មួយ​ដែល​គ្រប់​ភាគី​ទទួល​យក​បាន​ និងពេញចិត្ត ព្រោះថា មានតែធាតុចូល ដែលឈរលើស្មារតីជាក់ស្តែងនិយម ដែលមិ​ន​ប៉ះពាល់​ដល់ភាគីណាមួយប៉ុណ្ណោះទេ ទើបធ្វើឱ្យការផ្លាស់ប្តូររថយន្តដឹកកម្មករនិយោជិត ដែល​ប្រកប​ដោយ​បទដ្ឋានបច្ចេកទេស និងផាសុកភាពនេះទទួលបានជោគជ័យ។

សូមរំលឹកថា ការផ្លាស់ប្តូរមធ្យោបាយធ្វើដំណើរសមរម្យនេះ គឺជាអនុសាសន៍មួ​យ​ក្នុង​ចំណោម​អនុសាសន៍ ១០ចំណុច ដែលសម្តេចនាយករដ្ឋមន្ត្រី ហ៊ុន ម៉ាណែត បានដាក់ឱ្យក្រសួងការងារ និង​បណ្តុះបណ្តាលវិជ្ជាជីវៈ។ ដើម្បីសម្រេចអនុសាសន៍នេះ ក្រសួងការងារ តាមរយៈ​បេឡាជាតិ​សន្តិសុខ​សង្គម បានរៀបចំការពិភាក្សាជាមួយភាគីពាក់ព័ន្ធចំនួន៦លើក រួចមកហើយ។

ជាមួយ​នឹងសិក្ខាសាលា ដែលមានទាំងកម្មករនិយោជិត និងសហជីពចូលរួម ឯកឧត្តមរដ្ឋមន្ត្រី បាន​រំលឹកថា រាជរដ្ឋាភិបាលកម្ពុជាក្រោមការដឹកនាំរបស់ សម្តេចនាយករដ្ឋមន្ត្រី ពិតជា​បាន​គិត​គូរ​រ​គ្រប់​ជ្រុង​ជ្រោយ ចំពោះកម្មករនិយោជិត មិនត្រឹមតែពេលកំពុងធ្វើការ ឬពេលមាន​បញ្ហា​សុខភាព​នោះ​ទេ សូម្បីតែពេលធ្វើដំណើរ ក៏ជាក្តីកង្វល់ ដែលរាជរដ្ឋាភិបាល​កំពុង​ផ្តោត​យក​ចិត្ត​ទុក​ដាក់​ខ្លាំង​ផង​ដែរ៕ អត្ថបទ ឈិត បូរ៉ាវី