អូឡាំពិក៖ ព្រឹត្តិការណ៍អូឡាំពិកទីក្រុងតូក្យូដែលហែលឆ្លងឧបសគ្គជាច្រើន ទីបំផុតបានបញ្ចប់ការប្រកួតដោយជោគជ័យ បន្ទាប់ពីពិធីបិទចុងក្រោយនៅយប់ថ្ងៃអាទិត្យម្សិលមិញ ដោយសហអាមេរិកជាប្រទេសដែលឈ្នះមេដាយមាសច្រើនជាងគេ។
ទាំងការលើកពេលពីឆ្នាំ២០២០ មក ២០២១ ការប្រកួតដោយបិទទ្វារ វិធានការតឹងរ៉ឺងខាងផ្នែកសុខាភិបាល បញ្ហាអាកាសធាតុ ការរិះគន់ពីប្រជាជនជប៉ុនមិនចង់ឱ្យជប៉ុនរៀបចំការប្រកួត ទាំងប្រទេសកំពុងស្ថិតក្នុងស្ថានភាពនៃការរីករាលដាលឆ្លងកើនឡើងមិនធ្លាប់មាន រួមជាមួយនឹងឧបសគ្គជាច្រើនទៀត ទាំងអស់នេះសុទ្ធតែជាបញ្ហាដែលជប៉ុនបានជម្នះ។ មុនពិធីបិទជាផ្លូវការនៅថ្ងៃអាទិត្យម្សិលមិញ ក៏មានអ្នកប្រឆាំងប្រមាណ ៣០នាក់នៅខាងក្រៅពហុកីឡដ្ឋានជាតិផងដែរ។ យ៉ាងណាក្តី អូឡាំពិកទីក្រុងតូក្យូ ២០២០ ដែលលើកមកដល់ ២០២១ ក៏ជាព្រឹត្តិការណ៍ដែលគួរឱ្យចងចាំមួយដែរ។
បិទប្រគល់ទង់អូឡាំពិក នៅទីក្រុងប៉ារីសប្រទេសបារាំងគឺជាម្ចាស់ផ្ទះបន្ទាប់ នៅព្រឹត្តិការណ៍អូឡាំពិកឆ្នាំ២០២៤ ផងដែរដោយមានប្រសាសន៍ស្វាគមន៍ទីក្រុងប៉ារីសម្ចាស់ផ្ទះអូឡាំពិក ២០២៤ ដោយប្រធានាធិបតីបារាំង Emmanuel Macron។ ក្រឡេកមកតារាងមេដាយវិញ អាមេរិកជាប្រទេសដែលឈ្នះមេដាយមាសច្រើនជាងគេ ៣៩គ្រឿង, ប្រាក់ ៤១, សំរឹទ្ធ ៣៣ សរុប ១១៣មេដាយ តាមពីក្រោយដោយចិន មេដាយមាស ៣៨គ្រឿង, ប្រាក់ ៣២, សំរឹទ្ធ ១៨ សរុប ៨៨គ្រឿង និងទី៣ ម្ចាស់ផ្ទះជប៉ុន មេដាយមាស ២៧គ្រឿង, ប្រាក់ ១៤, សំរឹទ្ធ ១៧ សរុប ៥៨គ្រឿង៕
អត្ថបទ៖នាង សុភាវុធ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
