លោតទឹក៖ អំឡុងការប្រកួតកីឡាអូឡាំពិកតូក្យូឆ្នាំ២០២០ ដែលទើបបញ្ចប់ផ្លូវការកាលពីថ្ងៃទី០៨ ខែសីហាម្សិលមិញ មានប្រជាពលរដ្ឋខ្មែរ ពិសេសអ្នកស្នេហាវិស័យកីឡាជាច្រើនបានចាប់អារម្មណ៍ ចំពោះកីឡាករជម្រើសជាតិអាមេរិកដើមកំណើតខ្មែរ Jordan Pisey Windle ដែលបានចូលរួមប្រកួតវិញ្ញាសាលោតទឹកកម្ពស់ ១០ម៉ែត្រ និងបានបញ្ចប់ក្នុងចំណាត់ថ្នាក់លេខ៩ នៃព្រឹត្តិការណ៍ពិភពលោក ៤ឆ្នាំម្ដងនេះ។
ទន្ទឹមជាមួយគ្នាមានមតិមួយចំនួនបានចោតសួរថា តើកីឡាករកូនខ្មែររូបនេះអាចមកចូលរួមក្រុមជម្រើសជាតិកម្ពុជាបានទេ ដ្បិតបច្ចុប្បន្នរូបគេមានសញ្ជាតិកីឡាគឺជាសញ្ជាតិអាមេរិកទៅហើយនោះ? ពាក់ព័ន្ធនឹងករណីនេះ លោក ហែម គិរី អគ្គលេខាធិការសហព័ន្ធខ្មែរកីឡាហែលទឹកបានពន្យាល់ថា កន្លងមកថ្នាក់ដឹកនាំសហព័ន្ធ និង Pisey ធ្លាប់ជជែកគ្នារួចមកហើយ។ ប៉ុន្ដែលក្ខខណ្ឌសំខាន់ ២ ដែលកីឡាករមានដើមកំណើតពីខេត្តព្រះសីហនុរូបនេះ អាចចូលលេងជម្រើសជាតិកម្ពុជាបាន ទី១-អាស្រ័យលើការសម្រេចចិត្តរបស់សាមីខ្លួន និងក្រុមគ្រួសាររបស់គេ ទី២-អាស្រ័យលើស្នើសុំផ្លាស់ប្ដូរសញ្ជាតិកីឡា ដោយគោរពនីតិវិធីច្បាប់របស់សហព័ន្ធកីឡាហែលទឹកអន្ដរជាតិ។ អគ្គលេខាធិការសហព័ន្ធដដែលបានបង្ហាញនូវមោទនភាពនូវអ្វីដែល Jordan Pisey កំពុងបង្ហាញទៅកាន់ពិភពលោក ក៏ដូចជាការបង្ហាញឆន្ទៈចង់លេងឲ្យក្រុមជម្រើសជាតិកម្ពុជា ជាក់ស្ដែងដូចជាការចាក់សាក់រូបទង់ជាតិកម្ពុជានៅដើមដៃខាងឆ្វេង គឺ Pisey ចង់បង្ហាញពិភពលោកថា រូបគេគឺជាជនជាតិខ្មែរ។ ដូច្នេះប្រសិនបើរូបគេសម្រេចចិត្តចង់មកលេងតំណាងកម្ពុជាពេលនេះ សហព័ន្ធនឹងរៀបចំនីតិវិធីដើម្បីស្នើសុំទៅសហព័ន្ធកីឡាហែលទឹកអន្ដរជាតិភ្លាម។
លោក ហែម គិរី បានបន្ថែមថា ប្រសិនបើ Jordan Pisey មកប្រកួតតំណាងកម្ពុជាមែន ច្បាស់ណាស់រូបគេមានក្ដីរំពឹងខ្ពស់ក្នុងការដណ្ដើមមេដាយ ជូនប្រទេសកំណើតរបស់ខ្លួនព្រោះផ្អែកលើលក្ខខណ្ឌបច្ចេកទេស Pisey គឺជាកីឡាករលំដាប់លេខ១ នៅអាស៊ាន ហើយនៅអាស៊ី គេឈរក្រោមតែកីឡាករចិន និងជប៉ុនប៉ុណ្ណោះ។ សូមបញ្ជាក់ថា Jordan Pisey បានចាប់កំណើតនៅខេត្តព្រះសីហនុ តែក្រោយឪពុកម្ដាយបានទទួលមរណភាពចោលអស់ កុមារមានឈ្មោះដើមថា ពិសី រូបនេះត្រូវបានបញ្ជូនមកមណ្ឌលកុមារកំព្រាមួយកន្លែងនៅរាជធានីភ្នំពេញ។ បន្ទាប់មកត្រូវបានឪពុកចញ្ចឹមជនជាតិអាមេរិក លោក Jerry Windle ធ្វើការស្នើសុំ និងយកទៅចិញ្ចឹមនៅសហរដ្ឋអាមេរិកតាំងពីអាយុ ១៨ខែរហូតមកទល់បច្ចុប្បន្ន ដោយប្ដូរឈ្មោះថា Jordan ហើយប្រើត្រកូល Windle ដែលមានឈ្មោះពេញថា Jordan Pisey Windle ។ ចំពោះអាជីពកីឡាវិញនៅវ័យ ៧ឆ្នាំ Jordan Pisey ត្រូវបានឪពុកនាំទៅហ្វឹកហាត់កីឡាលោតទឹក ដោយមានទេពកោសល្យល្អ រូបគេបានវិវត្ដន៍ខ្លួនក្លាយជាកីឡាករដ៏ឆ្នើមម្នាក់នៅអាមេរិក តាំងពីអាយុ ១២ឆ្នាំ ដោយធ្លាប់ដណ្ដើមបានមមេដាយមាស ប្រាក់ និងសំរឹទ្ធថ្នាក់ជាតិជាច្រើន រហូតដល់ឆ្នាំ២០២០ កីឡាករខ្មែរអាមេរិករូបនេះត្រូវបានជ្រើសរើសជាសមាជិកក្រុមកីឡាលោតទឹកជម្រើសជាតិអាមេរិក ដើម្បីចូលរួមប្រកួតកីឡាអូឡាំពិកទីក្រុងតូក្យូឆ្នាំ២០២០ ដែល Jordan Pisey បានបញ្ចប់ក្នុងចំណាត់ថ្នាក់លេខ៩ លើវិញ្ញាសាលោតទឹកកម្ពស់ ១០ម៉ែត្រ កាលពីចុងសប្ដាហ៍កន្លងទៅ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
