ការិយាល័យកិច្ចការកោះតៃវ៉ាន់របស់ប្រទេសចិន បាននិយាយនៅថ្ងៃពុធ ទី២៩ ខែ ឧសភា នេះថា សមយុទ្ធយោធារបស់ប្រទេសនៅជុំវិញកោះតៃវ៉ាន់ កាលពីសប្តាហ៍មុន គឺជាសកម្មភាពសមហេតុផល ហើយដរាបណា ការបង្កហេតុដោយឯករាជ្យរបស់កោះតៃវ៉ាន់នៅតែបន្ត សកម្មភាពយោធារបស់ចិន ក៏នឹងមានជាបន្តផងដែរ។

ប្រទេសចិន បានបញ្ចប់ហ្គេមសង្រ្គាមរយៈពេលពីរថ្ងៃនៅជុំវិញកោះតៃវ៉ាន់ ដែលប្រទេសនេះក្លែងប្រដូចការពិតទៅនឹងការវាយប្រហារដោយមានយន្តហោះទម្លាក់គ្រាប់បែក និងអនុវត្តការឡើងលើនាវា ជាសមយុទ្ធ ដែលកោះតៃវ៉ាន់ និយាយថាជាការឃោសនា និងជាការបំភិតបំភ័យ ជាជាងការចាប់ផ្តើមសង្រ្គាមទៅទៀត។

ប្រទេសចិន ចាត់ទុកកោះតៃវ៉ាន់គ្រប់គ្រងតាមបែបលទ្ធិប្រជាធិបតេ្យ ថាជាដែនដីរបស់ខ្លួន និងពុំដែលបោះបង់ចោលការប្រើកម្លាំងដើម្បីក្រសោបយកកោះនេះមកវិញឱ្យស្ថិតក្រោមការគ្រប់គ្រងរបស់ខ្លួនម្តងណាឡើយ។ មេដឹកនាំនាំកោះតៃវ៉ាន់ លោក ឡៃ ឆឹងទឺ (Lai Ching-te) បានច្រានចោលការអះអាងសិទ្ធដែនអធិបតេយ្យភាពរបស់ប្រទេសចិន ដោយនិយាយថា មានតែប្រជាជនកោះតៃវ៉ាន់ប៉ុណ្ណោះ ដែលអាចសម្រេចពីអនាគតរបស់ពួកគេ ហើយបានស្នើឱ្យមានការពិភាក្សាម្តងហើយម្តងទៀតជាមួយទីក្រុងប៉េកាំង ប៉ុន្តែត្រូវបានបដិសេធ។

លោកស្រី Zhu Fenglian អ្នកនាំពាក្យការិយាល័យកិច្ចការកោះតៃវ៉ាន់របស់ប្រទេសចិន បាននិយាយថា «ប្រព័ន្ធខុសគ្នា ពុំមែនជាឧបសគ្គក្នុងការបង្រួបបង្រួមគ្នាវិញនោះទេ កុំទុកឱ្យមានការដោះសារសម្រាប់ការផ្តាច់ខ្លួន»។

រដ្ឋាភិបាលទីក្រុងតៃប៉ិ និយាយថា កោះតៃវ៉ាន់ជាដែនដីឯករាជ្យរួចហើយ គឺសាធារណរដ្ឋចិន។

យោងតាមការបោះឆ្នោតស្ទង់មតិ បានឲ្យដឹងថា ប្រទេសចិន និយាយថាការសម្រេចចិត្តណាមួយ លើអនាគតរបស់កោះតៃវ៉ាន់ គឺសម្រាប់ប្រជាជន ១,៤ ពាន់លាននាក់របស់ប្រទេសចិនទាំងអស់ដែលត្រូវសម្រេច ពុំមែនត្រឹមតែប្រជាជនកោះតៃវ៉ាន់២៣ លាននាក់ប៉ុណ្ណោះទេ ហើយបានផ្តល់នូវគំរូស្វ័យភាព «ប្រទេសមួយ ប្រព័ន្ធពីរ» តាមបែបក្រុងហុងកុង ទោះបីជាវាស្ទើរតែគ្មានការគាំទ្រជាសាធារណៈក៏ដោយ។