ការិយាល័យអាកាសធាតុរបស់រដ្ឋាភិបាល បានឲ្យដឹងថា សីតុណ្ហភាពនៅក្នុងរដ្ឋធានីរបស់ប្រទេសឥណ្ឌាបានឡើងដល់កម្រិតខ្ពស់បំផុត ៤៩,៩អង្សាសេ កាលពីថ្ងៃអង្គារ (ទី២៨ ខែឧសភា)។

នាយកដ្ឋានឧតុនិយមរបស់ប្រទេសឥណ្ឌា ដែលបានរាយការណ៍ពី «ស្ថានភាពរលកកម្ដៅក្ដៅខ្លាំង» បានកត់ត្រាសីតុណ្ហភាព នៅស្ថានីយ៍ជាយក្រុង New Delhi ចំនួន២ គឺ Narela និង Mungeshpur។ អ្នកព្យាករ បានប៉ាន់ស្មានពីសីតុណ្ហភាពស្រដៀងគ្នា នៅថ្ងៃពុធ (ទី២៩ ខែឧសភា) នេះ។ កាលខែឧសភា ឆ្នាំ២០២២ ផ្នែកខ្លះនៃទីក្រុង New Delhi បានឡើងដល់ ៤៩,២អង្សាសេ។ នេះបើតាមសេចក្ដីរាយការណ៍ពីប្រព័ន្ធផ្សព្វផ្សាយឥណ្ឌា នាពេលនោះ។

គួរបញ្ជាក់ថា ប្រទេសឥណ្ឌាមិនមានអ្វីចម្លែកនោះទេ ក្នុងការជួបប្រទះនឹងសីតុណ្ហភាពក្ដៅខ្លាំង ក្នុងរដូវក្តៅ។ ប៉ុន្តែការស្រាវជ្រាវវិទ្យាសាស្ត្រជាច្រើនឆ្នាំមកនេះ បានរកឃើញថា បម្រែបម្រួលអាកាសធាតុ កំពុងធ្វើឲ្យរលកកម្ដៅមានរយៈពេលកាន់តែយូរ ញឹកញាប់ និងខ្លាំងក្លាជាងមុន។

ហើយជាមួយគ្នានេះ អាជ្ញាធរទីក្រុង New Delhi ក៏បានព្រមានពីហានិភ័យនៃការខ្វះខាតទឹកផងដែរ នៅពេលដែលរដ្ឋធានីមួយនេះ បានជួបប្រទះភាពហួតហែង អំឡុងពេលមានរលកកម្ដៅក្ដៅខ្លាំង ដោយអាជ្ញាធរបានកាត់បន្ថយការផ្គត់ផ្គង់ដល់តំបន់មួយចំនួន។

លើសពីនេះទៀត នាយកដ្ឋានឧតុនិយមរបស់ប្រទេសនេះ បានព្រមានពីផលប៉ះពាល់នៃកម្ដៅដល់សុខភាព ជាពិសេសចំពោះទារក ចាស់ជរា និងអ្នកដែលមានជំងឺរ៉ាំរ៉ៃ៕