សិស្សជាច្រើននាក់ នៅភាគខាងកើតប្រទេសឥណ្ឌា ត្រូវបានបញ្ជូនទៅកាន់មន្ទីរពេទ្យយ៉ាងប្រញ៉ាប់ប្រញាល់ បន្ទាប់ពីពួកគេ បានដួលសន្លប់ដោយសារតែសីតុណ្ហភាពហក់ឡើងខ្លាំង នៅក្នុងតំបន់។

ប្រព័ន្ធផ្សព្វផ្សាយក្នុងស្រុកបានរាយការណ៍ថា យ៉ាងហោចណាស់សិស្ស៦នាក់ នៅក្នុងសាលារៀនមួយកន្លែង ក្នុងទីក្រុង Sheikpura បានដួលសន្លប់ អំឡុងពេលជួបជុំគ្នាបន់ស្រន់។ ពួកគេ ត្រូវបានផ្តល់ជំនួយសង្គ្រោះបឋម ក្រោយមកត្រូវបញ្ជូនបានទៅកាន់មន្ទីរពេទ្យនៅក្បែរនោះ ដើម្បីព្យាបាល។

ក្រុមវេជ្ជបណ្ឌិត និយាយថា ហេតុការណ៍ស្រដៀងគ្នានេះ ក៏បានកើតឡើងនៅក្នុងក្រុង Begusarai ជាកន្លែងដែលសិស្សជាង១០នាក់ បានដួលសន្លប់ដោយសារកម្តៅ ក្តៅខ្លាំង។

សិស្សទាំងអស់ ស្ថិតក្នុងស្ថានភាពមានស្ថិរភាព។ សីតុណ្ហភាពនៅក្នុងក្រុង Sheikpura និងក្រុង Begusarai បានហក់ឡើងលើសពី៤០ អង្សាសេ។

ប្រទេសឥណ្ឌា បាននឹងកំពុងរកវិធីដោះស្រាយចំពោះសីតុណ្ហភាពហក់ឡើងខ្ពស់ ខុសពីធម្មតានៅរដូវក្តៅនេះ ហើយនាយកដ្ឋានអាកាសធាតុ បាននិយាយថា «រលកកម្តៅ នឹងមានស្ថានភាពធ្ងន់ធ្ងរ» ដែល ទំនងជានឹងបន្តនៅក្នុងផ្នែកជាច្រើន រួមទាំងនៅក្នុងរដ្ឋធានីផងដែរ រហូតដល់ថ្ងៃពុធនេះ។