មន្ត្រីសេតវិមាន បាននិយាយកាលពីថ្ងៃអង្គារថា សហរដ្ឋអាមេរិក និងដៃគូរបស់ខ្លួន បានត្រៀមខ្លួនដើម្បីប្រើប្រាស់ទណ្ឌកម្ម និងការត្រួតពិនិត្យការនាំចេញ ដើម្បីទប់ស្កាត់ពាណិជ្ជកម្មចិន-រុស្ស៊ី ដែលគំរាមកំហែងដល់សន្តិសុខរបស់ពួកគេ ស្របពេលសង្គ្រាមអ៊ុយក្រែនដែលកំពុងបន្ត។

ទីប្រឹក្សាសន្តិសុខជាតិរងរបស់សេតវិមានទទួលបន្ទុកផ្នែកសេដ្ឋកិច្ចអន្តរជាតិ លោក Daleep Singh បាននិយាយថា ប្រទេសទាំងនេះ ក៏អាចធ្វើសកម្មភាពបន្ថែមទៀត ដើម្បីធ្វើឲ្យរុស្ស៊ីខាតបង់ក្នុងការប្រើប្រាស់កងនាវាស្រមោល ដើម្បីគេចចេញពីការកំណត់តម្លៃប្រេងរបស់ក្រុមប្រទេស G7។

លោក Singh បាននិយាយថា ពួកគេក៏អាចពង្រីកភាសាទណ្ឌកម្មបច្ចុប្បន្ន ទាក់ទងនឹងការសម្របសម្រួលផ្នែកហិរញ្ញវត្ថុដែលបាននាំឲ្យទីក្រុងមូស្គូសម្រេចផ្លាស់ប្តូរសេដ្ឋកិច្ចរបស់ខ្លួន ទៅរកការបង្វែរទិសដៅនៃសង្រ្គាម ទោះបីជាលោក បានបដិសេធមិននិយាយថាតើសហរដ្ឋអាមេរិក និងសម្ព័ន្ធមិត្ត កំពុងប្រឹងប្រែងដើម្បីអនុម័តទណ្ឌកម្មបន្ទាប់បន្សំដែរ ឬយ៉ាងណា?

លោកបានកត់សម្គាល់ថា ប្រទេសរុស្ស៊ីពឹងផ្អែកទាំងស្រុងលើប្រទេសចិន ដោយផ្តល់ឲ្យទីក្រុងប៉េកាំងនូវ     «ឥទ្ធិពលដ៏លើសលប់»លើសមត្ថភាពរបស់ទីក្រុងមូស្គូក្នុងគម្រោងថាមពល ហើយប្រទេសចិន ក៏ប្រឈមមុខនឹងហានិភ័យ និងការចំណាយផងដែរ ដោយសារពាណិជ្ជកម្មទំនិញរួមបញ្ចូលគ្នាជាមួយសហភាពអឺរ៉ុប និងសហរដ្ឋអាមេរិក មានចំនួន ៧ដងនៃទំហំពាណិជ្ជកម្មរបស់ខ្លួនជាមួយរុស្ស៊ី។