មេដឹកនាំគណបក្សប្រឆាំងដ៏សំខាន់របស់ប្រទេសអាហ្រ្វិកខាងត្បូង គឺលោក John Steenhuisen បានបោះឆ្នោត នៅថ្ងៃពុធ (ទី២៩ ខែឧសភា) នេះ ក្នុងទីក្រុង Durban ដែលជាស្រុកកំណើតរបស់លោក ហើយបន្ទាប់ពីបានទម្លាក់សន្លឹកឆ្នោតចូលទៅក្នុងធុងរួចហើយនោះ លោកបានប្រកាសពីការប្តេជ្ញាចិត្តរបស់លោក ក្នុងការផ្លាស់ប្តូរទិដ្ឋភាពនយោបាយបច្ចុប្បន្នរបស់ប្រទេស។

ដោយនិយាយជាមួយសារព័ត៌មាន Reuters បន្ទាប់ពីការបោះឆ្នោតរបស់លោក មេដឹកនាំរបស់គណបក្សសម្ព័ន្ធប្រជាធិបតេយ្យ (DA) បានលើកឡើងពីសក្តានុពលសម្រាប់សម្ព័ន្ធភាពនយោបាយ ប្រសិនបើគណបក្សរបស់លោក មិនទទួលបានសំឡេងភាគច្រើន ៥១ភាគរយទេនោះ។ គួរបញ្ជាក់ថា ប្រសិនបើគណបក្សមួយ មានសំឡេងតិចជាង ៥០ភាគរយ នោះវានឹងចាំបាច់ត្រូវមានកិច្ចព្រមព្រៀងជាមួយគណបក្សតូចៗចំនួនមួយ ឬច្រើន ដើម្បីដឹកនាំប្រទេស។

លោក Steeinhuisen បានស្តីបន្ទោសមេដឹកនាំបច្ចុប្បន្នថា បានបង្កើតឲ្យមានបញ្ហាប្រឈមធំៗរបស់ប្រទេស ក្នុងនោះរួមទាំងអត្រាគ្មានការងារធ្វើខ្ពស់ ភាពក្រីក្ររីករាលដាល និងការកើនឡើងនៃអត្រាឧក្រិដ្ឋកម្ម ដោយបញ្ជាក់ថា ភាពជាអ្នកដឹកនាំ ចាំបាច់ត្រូវតែផ្លាស់ប្ដូរ។

ប្រជាជនអាហ្រ្វិកខាងត្បូងជាង ២៧លាននាក់ បានចុះឈ្មោះបោះឆ្នោត ហើយគេរំពឹងថា គណៈកម្មាធិការជាតិរៀបចំការបោះឆ្នោត នឹងចាប់ផ្តើមបញ្ចេញលទ្ធផលមួយផ្នែក ក្នុងរយៈពេលប៉ុន្មានម៉ោង បន្ទាប់ពីការិយាល័យបោះឆ្នោត ត្រូវបានបិទ៕