ប្រទេសលីបង់ បានផ្លាស់ប្តូរចំណាត់ការក្នុងការអនុញ្ញាតឲ្យតុលាការឧក្រិដ្ឋកម្មអន្តរជាតិ (ICC)ស៊ើបអង្កេតឧក្រិដ្ឋកម្មសង្គ្រាម ដែលត្រូវបានចោទប្រកាន់នៅលើដីរបស់ខ្លួន ដោយជំរុញឲ្យក្រុមសិទ្ធិមនុស្សដ៏លេចធ្លោមួយបដិសេធនូវអ្វីដែលខ្លួនហៅថា ការបាត់បង់ «ឱកាសជាប្រវត្តិសាស្ត្រ» សម្រាប់យុត្តិធម៌។

ប្រទេសលីបង់ បានចោទប្រកាន់អ៊ីស្រាអែលថា បានបំពានច្បាប់អន្តរជាតិម្តងហើយម្តងទៀត ចាប់តាំងពីខែតុលា នៅពេលដែលយោធាអ៊ីស្រាអែល និងក្រុមប្រដាប់អាវុធលីបង់ហេសបូឡា ( Hezbollah) បានចាប់ផ្តើមបាញ់ប្រហារគ្នា ស្របគ្នាជាមួយនឹងសង្រ្គាមហ្កាហ្សា។ ការបាញ់ផ្លោងរបស់អ៊ីស្រាអែល ចាប់តាំងពីពេលនោះមក បានសម្លាប់ជនស៊ីវិលប្រហែល ៨០នាក់ នៅក្នុងប្រទេសលីបង់ រួមទាំងកុមារ គ្រូពេទ្យ និងអ្នកយកព័ត៌មានផងដែរ។

ទាំងប្រទេសលីបង់ និងអ៊ីស្រាអែល មិនមែនជាសមាជិកនៃតុលាការ ICC នោះទេ ដូច្នេះការប្រកាសជាផ្លូវការទៅកាន់តុលាការនេះ នឹងត្រូវបានទាមទារពីអ្នកទាំងពីរ ដើម្បីផ្តល់យុត្តាធិការដល់ខ្លួន ដើម្បីចាប់ផ្តើម ការស៊ើបអង្កេត នៅក្នុងរយៈពេលជាក់លាក់ណាមួយ។

កាលពីខែមេសា គណៈរដ្ឋមន្ត្រីចាំផ្ទះរបស់ប្រទេសលីបង់ បានបោះឆ្នោតបង្គាប់ឲ្យក្រសួងការបរទេសដាក់សេចក្តីប្រកាសមួយ ទៅកាន់តុលាការ ICC ដែលអនុញ្ញាតឲ្យខ្លួនស៊ើបអង្កេត និងកាត់ទោសឧក្រិដ្ឋកម្ម សង្គ្រាមដែលត្រូវបានចោទប្រកាន់នៅលើទឹកដីលីបង់ ចាប់តាំងពីថ្ងៃទី៧ ខែតុលា។

រដ្ឋមន្ត្រីការបរទេស Abdallah Bou Habib មិនដែលដាក់សេចក្តីប្រកាសដែលបានស្នើសុំនោះទេ ហើយកាលពីថ្ងៃអង្គារ គណៈរដ្ឋមន្ត្រីបានចេញផ្សាយការកែប្រែសេចក្តីសម្រេច ដែលបានលុបចោលសំណើទៅកាន់តុលាការ ICC ដោយនិយាយថា ប្រទេសលីបង់ នឹងដាក់ពាក្យបណ្តឹងទៅអង្គការសហប្រជាជាតិជំនួសវិញ។

ប្រទេសលីបង់ បានដាក់ពាក្យបណ្ដឹងជាទៀងទាត់ទៅក្រុមប្រឹក្សាសន្តិសុខអង្គការសហប្រជាជាតិអំពីការវាយប្រហាររបស់អ៊ីស្រាអែល ក្នុងរយៈពេល ៧ខែកន្លងមកនេះ ប៉ុន្តែពួកគេ មិនបានចេញសេចក្តីសម្រេចណាមួយដែលជាប់កាតព្វកិច្ចរបស់អង្គការសហប្រជាជាតិនោះទេ។