​បាល់ទាត់៖ ​គ្រូបង្វឹក AS Roma លោក Jose Mourinho ត្រូវបាន​បណ្តេញចេញ​ក្នុងការ​ប្រកួត​មិត្តភាព​ដែល Roma ចាញ់​នៅ​ទឹកដី Real Betis ៥-២​។

​​ក្រុម​ម្ចាស់ផ្ទះ Betis បាន​នាំមុខ ៣-២ ត្រឹម​នាទី​ទី៥៧ តែ​កីឡាករ​របស់ Roma បាន​បង្កជំលោះ​ជាមួយ Alex Moreno មុនពេល​ដែល Lorenzo Pellegrini ទទួលបាន​កាត​លឿង​ទី២ បណ្តេញ​ចេញពី​ការប្រកួត ស្រប​ពេលដែល Jose Mourinho ក៏​ត្រូវបាន​បណ្តេញចេញ​ដែរ​ ក្រោយ​ប្រតិកម្ម​តវ៉ា​នឹង​អាជ្ញាកណ្តាល​។​ ​​កីឡាករ Gianluca Mancini និង Rick Karsdorp ក្រោយមក​ក៏​ទទួលបាន​កាត​លឿង​ទី២ ដែរ មុនពេល​ដែល Cristian Tello និង Roberto Gonzalez រកបាន​ម្នាក់ ១គ្រាប់​ទៀត​ឱ្យ Real Betis យកឈ្នះ Roma ដែល​នៅសល់​គ្នា​តែ ៨នាក់​លទ្ធផល ៥-២​។

​​Real Betis នឹងត្រូវ​ចាប់ផ្តើម​រដូវ​កាល​ថ្មី La Liga នៅ​ថ្ងៃ​សៅរ៍​ចុង​សប្តាហ៍​នេះ​នៅ​ទឹកដី Real Mallorca​។​ ​​ចំណែក AS Roma នៅសល់​ការប្រកួត​មិត្តភាព​ ១ប្រកួត​ទៀត​ជួប​ជាមួយ​ក្រុម​ម៉ា​រ៉ុ​ក Raja Casablanca នៅ​ថ្ងៃ​សៅរ៍​ចុង​សប្តាហ៍​នេះដែរ មុនពេល​ប្រកួត Europa Conference League វគ្គ Play-Off ថ្ងៃទី១៩ ខែសីហា ខណៈ​រដូវ​កាល​ថ្មី​ក្របខណ្ឌ​អ៊ីតាលី Serie A នឹង​ចាប់ផ្តើម​នៅ​ថ្ងៃទី២២ ខែសីហា​នេះ​ដោយ Roma ត្រូវ​ទៅ​ទឹកដី Fiorentina៕

​អត្ថបទ​៖​នាង សុភា​វុ​ធ