ដោយទទួលបានការគាំទ្រ និងអនុញ្ញាតពីសហព័ន្ធកីឡាកាបាឌីពិភពលោក ក្រោមកិច្ច​សហការ​ជាមួយ​អង្គភាពកីឡាក្រសួងមហាផ្ទៃ ក្រុមកាងារកីឡាកាបាឌីកម្ពុជា បានសម្រេច​ទទួល​រៀបចំ​ការ​ប្រកួត​កីឡាកាបាឌីពានរង្វាន់ពិភពលោក World Cup Kabaddi ឆ្នាំ២០២៤ នាខែសីហាខាងមុខ ដោយ​មានអត្តពលិកប្រមាណ ៤០០នាក់ មកពី ១៨ប្រទេសចូលរួម។

នេះបើតាមការបញ្ជាក់របស់ឯកឧត្តម ជិន សំណាង ទីប្រឹក្សារាជរដ្ឋាភិបាល និង​ជា​ប្រធាន​ក្រុម​ការងារ​កីឡាកាបាឌីកម្ពុជា ក្នុងសន្និសីទសារព័ត៌មាន ស្ដីពីការប្រកួត World Cup Kabaddi នៅ វ័នផាក មជ្ឈមណ្ឌលទីក្រុងភ្នំពេញ កាលពីថ្ងៃទី២៩ ខែឧសភា ឆ្នាំ២០២៤ ក្នុងនោះ​ក៏​មាន​ការ​ចូល​រួម​ជាសក្ខីភាពពីលោក S.T. Arasu អគ្គលេខាធិការ​សហព័ន្ធ​កីឡាកាបាឌី​ពិភពលោក​ផង​ដែរ​។

កីឡាកាបាឌី គឺជាប្រភេទកីឡាប្រពៃណីដ៏ចំណាស់មួយរបស់ប្រទេសឥណ្ឌា ដែលដើម​កំណើត​ជាង ៥ពាន់ឆ្នាំមុន ។ ចំពោះរបៀបលេងកីឡានេះ គឺស្រដៀងនឹងល្បែងប្រជាប្រិយកម្ពុជា ១ប្រភេទ ដែលប្រជាពលរដ្ឋ ពិសេសក្មេងៗ និងយុវជននិយមលេងតាមជនបទ ដែលគេឲ្យឈ្មោះ «ល្បែងអ៊ូ ឬលេងអ៊ូ» ។ ដោយពិនិត្យសើរៗលើទម្រង់នៃការលេងនេះ ថ្នាក់ដឹក​នាំកីឡា​​កាបាឌី​កម្ពុជា ​បានសន្និដ្ឋានដោយប្រហែលៗថា ប្រភេទកីឡាទាំងពីរ ក៏ទំនាក់ទំនងនឹងគ្នា ដូចទំនាក់​ទំនង​ប្រពៃណី វប្បធម៌ រវាងកម្ពុជា និងឥណ្ឌាដែរ ។

ឯកឧត្តម ជិន សំណាង បានបញ្ជាក់ថា នេះគឺជាការបើកទំព័រថ្មី ក្នុងការ​នាំ​យក​កីឡា​កាបាឌី​មក​កាន់​ប្រទេស​កម្ពុជា ។ ទោះបីមិនទាន់រៀបចំមហាសន្និបាតបង្កើតជាសហព័ន្ធផ្លូវការ តែដោយ​សារ​មរតក​ស៊ីហ្គេម ឆ្នាំ២០២៣ ដែលជាមហាជោគជ័យព្រឹត្តិការណ៍ជាប្រវត្តិសាស្ដ្រ ធ្វើឲ្យថ្នាក់​ដឹកនាំ​សហព័ន្ធ​កីឡាកាបាឌីពិភពលោក ចាប់អារម្មណ៍ និងអនុញ្ញាតឲ្យកម្ពុជា រៀបចំការ​ប្រកួត​ពាន​រង្វាន់ World Cup Kabaddi 2024 ចាប់ពីថ្ងៃទី២០-២៥ ខែសីហា ឆ្នាំ២០២៤ ខាងមុខ នៅរាជ​ធានីភ្នំពេញ ។

ប្រធានក្រុមការងារកីឡាកាបាឌីកម្ពុជាដដែលបន្ដថា នេះគឺជាការចាប់ផ្ដើម តែ​មិនមែន​ជា​ការ​បញ្ចប់​នោះ​ទេ ពោលគឺក្រោយរៀបចំព្រឹត្តិការណ៍អន្ដរជាតិលើកដំបូងនេះ ក្រុមការងារ​ខ្លួន​នឹង​ព្យាយាម​អភិវឌ្ឍន៍បន្ថែម ដើម្បីបណ្ដុះបណ្ដាល​ធនធាន​មនុស្ស​ឆ្ពោះ​ទៅរកការ​ប្រកួត​អន្ដរជាតិ​ផ្សេងៗ​នា​ថ្ងៃ​អនាគត ដូចប្រភេទកីឡាដទៃទៀតដែរ។

ទន្ទឹមជាមួយគ្នា ក្នុងនាមដៃគូសហការរៀបចំក្រុមកីឡាករ-កីឡាការិនី ត្រៀមការប្រកួត World Cup Kabaddi  នាខែសីហាខាងមុខ ឯកឧត្តម យិត ភីរៈ អគ្គលេខាធិការ​ក្រុម​ប្រឹក្សា​កីឡា​ក្រសួង​មហាផ្ទៃ បានសម្ដែងការគាំទ្រពេញ ចំពោះការនាំ​យក​ប្រភេទ​កីឡា​ប្រពៃណី​មួយរ​បស់​ប្រទេស​ឥណ្ឌា មកកាន់ទឹកដីកម្ពុជា ដើម្បីផ្ដល់លទ្ធភាពឲ្យយុវជនបានលេងកីឡាថ្មីមួយទៀត ហើយ​ក៏​ជា​ការ​បំផុស​នូវការលេង «ល្បែងអ៊ូ» របស់ខ្មែរ ដែលមានរបៀបរបបលេងស្រដៀងគ្នាផងដែរ ។

តាមការបញ្ជាក់របស់លោក Arasu អគ្គលេខាធិការសហព័ន្ធកីឡាកាបាឌីពិភពលោក បាន​ឲ្យ​ដឹង​ថា ការប្រកួត World Cup Kabaddi 2024 នៅកម្ពុជា នឹងមានអត្តពលិកយ៉ាងហោច ១៨​ប្រទេស មកពី ៥ទ្វីប ក្នុងនោះមានប្រតិភូ និងកីឡាករ-កីឡាការិនីប្រមាណ ៤០០នាក់ចូលរួម ។ ក្នុង​នាមសហព័ន្ធពិភពលោក លោកបានប្ដេជ្ញាផ្ដល់ការគាំទ្រគ្រប់បែបយ៉ាង ពិសេស​លើ​ការងារ​បច្ចេកទេស ដើម្បីជំរុញព្រឹត្តិការណ៍នេះឲ្យបានរលូន និងជោគជ័យ ដូចកាលស៊ីហ្គេម ឆ្នាំ២០២៣ នៅ​កម្ពុជាដែរ ៕ អត្ថបទ លី ឈុនឡា