ឯកឧត្តម កែ ប៊ុនខៀង រដ្ឋលេខាធិការក្រសួងអប់រំ យុវជន និងកីឡា បានក្រើនរម្លឹក និង​លើកទឹក​ចិត្ត​ដល់​កីឡាករ-កីឡាការិនីកម្ពុជាទាំងអស់ ដែលត្រៀមចូលរួមការប្រកួតកីឡាសិស្សអាស៊ាន លើក​ទី១៣ នៅវៀតណាម និងការប្រកួតកីឡាសាកលវិទ្យាល័យអាស៊ាន លើកទី២១ នៅ​ឥណ្ឌូនេស៊ី នាខែមិថុនាខាងមុខ ត្រូវមានមហិច្ឆតាខ្ពស់ ក្នុងការប្រជែងមេដាយជូនជាតិ។

ការក្រើនរម្លឹកនេះ បានធ្វើឡើងក្នុងពិធីជួបសំណេះសំណាល ផ្ដាំផ្ញើ និងលើកទឹកចិត្ត​ដល់​ប្រតិភូ​កីឡា​សិស្ស និងនិស្សិតទាំងអស់ ដែលត្រៀមចូលរួមប្រកួតព្រឹត្តិការណ៍ ២ផ្សេងគ្នា នាខែក្រោយ នៅ​មជ្ឈមណ្ឌលជាតិហ្វឹកហ្វឺនកីឡា កាលពីល្ងាចថ្ងៃទី២៩ ខែឧសភា ឆ្នាំ២០២៤ ក្នុង​នោះ​ក៏​មាន​ការ​អញ្ជើញចូលរួមពីឯកឧត្តម សាមឺឌី ស៊ីវឌ្ឍនា រដ្ឋលេខាធិការ តំណាងឯកឧត្តម​បណ្ឌិត​សភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡាផងដែរ ។

ក្នុងនាមថ្នាក់ដឹកនាំក្រសួងអប់រំ និងជាប្រធានប្រតិភូដឹកនាំផ្ទាល់ ឯកឧត្តម កែ ប៊ុនខៀង បានចាត់​ទុក​បេសកកម្មនាពេលឆាប់ៗខាងមុខ គឺជាមោទនភាពដ៏ធំធេងមួយ ក្នុងនាមប្រតិភូ និងអត្ត​ពលិក​តំណាង​ជាតិ។ តាមរយៈនេះ ទាំងថ្នាក់ដឹកនាំ គ្រូបង្វឹក និងកីឡាករ-កីឡាការិនី ត្រូវមានសង្ឃឹម និង​ជឿជាក់ថា ការចូលរួមប្រកួតនេះ គឺដើម្បីដណ្ដើមនូវអ្វីដែលខ្លួនចង់បាន ។ ទោះបីកីឡាលេង ដើម្បី​សុខភាព រឹតចំណងមិត្តភាព សាមគ្គីភាព តែការដណ្ដើមមេដាយ និងកិត្តិយសជូនជាតិ ក៏ជា​រឿង​សំខាន់ ដែលត្រូវខំប្រឹងទាំងអស់គ្នាផងដែរ ។

ជាមួយគ្នាដែរ ឯកឧត្តម សាមឺឌី ស៊ីវឌ្ឍនា ក៏បានដាស់តឿនដល់កីឡាករ-កីឡាការិនីគ្រប់រូប ត្រូវ​ប្រកាន់​ភ្ជាប់​ឲ្យបានដាច់ខាតនូវវិន័យ ក្រមសីលធម៌ និងសុជីវធម៌ ទាំងនៅកន្លែងស្នាក់នៅ ពេល​ធ្វើ​ដំណើរ ក៏ដូចជាកន្លែងប្រកួត ក្នុងមានជាអត្តពលិកតំណាងប្រទេសកម្ពុជា ពិសេស​ត្រូវ​ចៀស​វាង​ដាច់​ខាត​នូវការប្រើប្រាស់សារធាតុហាមឃាត់ក្នុងវិស័យកីឡា ។ នេះគឺជាផ្នែកមួយដ៏សំខាន់ បន្ថែម​លើការប្រកួតប្រជែង ដើម្បីផ្សាភ្ជាប់ទំនាក់ទំនងល្អ រវាងសិស្ស-និស្សិត នៃបណ្ដា​ប្រទេស​នីមួយៗ ស្របតាមគោលបំណងរួមរបស់អាស៊ាន ដែលរៀបចំព្រឹត្តិការណ៍នេះឡើង ។

ឯកឧត្តម ប៉ុន សុខ អគ្គនាយក នៃអគ្គនាយកដ្ឋានកីឡា និងជា​អគ្គលេខាធិការ​សហព័ន្ធ​កីឡា​សិស្ស-និសិ្សត កម្ពុជា បានគូសបញ្ជាក់ថា សម្រាប់ការប្រកួតកីឡាសិស្សអាស៊ាន លើកទី១៣ នឹង​ចាប់​ផ្ដើមពីថ្ងៃទី០១ ដល់ថ្ងៃទី០៩ ខែមិថុនា ឆ្នាំ២០២៤ នៅទីក្រុងដាណាង ប្រទេសវៀតណាម ដោយ​កម្ពុជា បានសម្រេចបញ្ជូនប្រតិភូកីឡាចំនួន ៤០នាក់ លើ ៤ប្រភេទកីឡាចូលរួមប្រកួត រួមមាន​កីឡាអត្តពលកម្ម, ហែលទឹក, វ៉ូវីណាម និងកីឡាវាយសី ដែលដឹកនាំដោយឯកឧត្តម កែ ប៊ុនខៀង ជាប្រធានប្រតិភូ ។

ចំណែកការប្រកួតកីឡានិសិ្សតសាកលវិទ្យាល័យអាស៊ាន លើកទី២១ នឹងប្រព្រឹត្តទៅ ចាប់ពី​ថ្ងៃទី២៥ ដល់ថ្ងៃទី០៦ ខែកក្កដា ឆ្នាំ២០២៤ នៅប្រទេសឥណ្ឌូណេស៊ី ដោយ​កម្ពុជា​សម្រេច​បញ្ជូន​ប្រតិភូ​កីឡាសរុប ៤៥នាក់ចូលរួម លើ ៦ប្រភេទកីឡា រួមមានកីឡាអត្តពលកម្ម, ហែល​ទឹក, ប៉េតង់, តេក្វាន់ដូ WT, ការ៉ាតេ និងកីឡាយូដូ ៕ អត្ថបទ លី ឈុនឡា