អង្គការសហប្រជាជាតិ ដែលបានព្រមានពីគ្រោះទុរ្ភិក្សនៅក្នុងតំបន់ហ្កាហ្សា បាននិយាយកាលពីថ្ងៃពុធ (២៩ ឧសភា) ថា បរិមាណជំនួយមនុស្សធម៌ដែលចូលទៅក្នុងតំបន់នោះបានធ្លាក់ចុះចំនួនពីរភាគបី ចាប់តាំងពីអ៊ីស្រាអែល បានចាប់ផ្តើមប្រតិបត្តិការយោធារបស់ខ្លួននៅក្នុងតំបន់រ៉ាហ្វា (Rafah) ភាគខាងត្បូងក្នុងខែនេះមក។

ការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌ (OCHA) បាននិយាយថា «បរិមាណស្បៀងអាហារ និងជំនួយផ្សេងទៀតចូលទៅក្នុងតំបន់ហ្កាហ្សា ដែលមិនគ្រប់គ្រាន់សម្រាប់បំពេញតម្រូវការនោះ បានធ្លាក់ចុះបន្ថែមទៀតចាប់តាំងពីថ្ងៃទី០៧ ខែឧសភា មក»។ អង្គការសហប្រជាជាតិបាននិយាយជាយូរមកហើយថា យ៉ាងហោចណាស់ត្រូវការរថយន្តដឹកទំនិញចំនួន ៥០០ គ្រឿងក្នុងមួយថ្ងៃសម្រាប់ជំនួយ និងទំនិញពាណិជ្ជកម្មចូលក្នុងតំបន់ហ្កាហ្សា ដើម្បីគ្រប់គ្រាន់បំពេញតម្រូវការ។

ចាប់តាំងពីសង្រ្គាមអ៊ីស្រាអែល និងក្រុមហាម៉ាស បានចាប់ផ្តើមជិតប្រាំបីខែមុនមក ជំនួយសម្រាប់ប្រជាជនប៉ាឡេស្ទីន ២,៣ លាននាក់ បានចូលជាចម្បងតាមរយៈច្រកឆ្លងកាត់ចំនួនពីរចូលទៅក្នុងហ្កាហ្សាភាគខាងត្បូង គឺច្រកព្រំដែនរ៉ាហ្វា ឆ្លងកាត់ពីអេហ្ស៊ីប និងច្រក កេរឹម សាលូម (Kerem Shalom) ឆ្លងកាត់ពីអ៊ីស្រាអែល។

ប៉ុន្តែការចែកចាយត្រូវបានរំខាន នៅពេលដែលអ៊ីស្រាអែល បានបង្កើនប្រតិបត្តិការយោធារបស់ខ្លួននៅក្នុងទីក្រុងរ៉ាហ្វា ដោយមានគោលបំណងកំណត់ទិសដៅនៃអង្គភាពដែលនៅសេសសល់របស់យុទ្ធជនហាម៉ាស។ ប្រទេសអេហ្ស៊ីប បានបិទច្រកឆ្លងកាត់ រ៉ាហ្វា ដោយសារតែការគម្រាមកំហែងដល់ការងារមនុស្សធម៌ ប៉ុន្តែកាលពីថ្ងៃសុក្រ សប្ដាហ៍មុន បានយល់ព្រមបញ្ជូនជំនួយ និងប្រេងឥន្ធនៈជាបណ្តោះអាសន្នតាមរយៈច្រក កេរឹម សាលូម៕