ប្រធានាធិបតីចិន លោក ស៊ី ជីនពីង (Xi Jinping) បាននិយាយនៅក្នុងសុន្ទរកថាមួយនៅថ្ងៃព្រហស្បតិ៍ (៣០ ឧសភា) នេះថា ប្រទេសចិន ចង់ធ្វើការជាមួយបណ្ដាប្រទេសអារ៉ាប់ដើម្បីដោះស្រាយបញ្ហាសំខាន់នានា នៅក្នុងវិធីសាស្រ្តដែលអំណោយផលដល់ការលើកកម្ពស់ភាពត្រឹមត្រូវ យុត្តិធម៌ និងការសម្រេចបាននូវសន្តិភាព និងស្ថិរភាពយូរអង្វែង រួមទាំងបញ្ហានៅតំបន់ហ្កាហ្សា។

លោក ស៊ី ត្រូវបានដកស្រង់សម្តីដោយប្រព័ន្ធផ្សព្វផ្សាយរដ្ឋនៅឯវេទិកាសហប្រតិបត្តិការរដ្ឋចិន-អារ៉ាប់ នៅទីក្រុងប៉េកាំង ដោយនិយាយថា ប្រទេសចិន កំពុងស្វះស្វែងរកការពង្រឹងទំនាក់ទំនងរបស់ខ្លួនជាមួយបណ្ដារដ្ឋអារ៉ាប់ ជាគំរូសម្រាប់ការរក្សាសន្តិភាព និងស្ថិរភាពពិភពលោក។

នៅក្នុងការលើកឡើងអំពីសង្គ្រាមនៅហ្កាហ្សា មេដឹកនាំចិនរូបនេះបាននិយាយថា សង្រ្គាមមិនអាចបន្តដោយគ្មានកំណត់នោះទេ យុត្តិធម៌មិនអាចអវត្តមានជាអចិន្ត្រៃយ៍ឡើយ ហើយ «ដំណោះស្រាយរដ្ឋពីរ» គួរតែត្រូវបានប្រកាន់ខ្ជាប់យ៉ាងរឹងមាំ។ ទីក្រុងប៉េកាំង បានអំពាវនាវម្តងហើយម្តងទៀតឱ្យមានដំណោះស្រាយរដ្ឋពីរចំពោះវិបត្តិប៉ាឡេស្ទីន-អ៊ីស្រាអែល ក៏ដូចជាបទឈប់បាញ់ជាបន្ទាន់ និងសមាជិកភាពប៉ាឡេស្ទីន នៅក្នុងអង្គការសហប្រជាជាតិ ដោយនោះជាជំហរត្រូវគ្នានឹងបណ្តាប្រទេសអារ៉ាប់។

ចិន កំពុងបង្កើនឥទ្ធិពលការទូតរបស់ខ្លួនក្នុងតំបន់ ដោយថ្មីៗនេះបានធ្វើជាម្ចាស់ផ្ទះកិច្ចចរចាលើកដំបូងលើទឹកដីចិន រវាងក្រុមហាម៉ាសប៉ាឡេស្ទីន និងក្រុមហ្វាតា (Fatah) ដែលមានជម្លោះយូរអង្វែង កាលពីខែមេសា។ កាលពីឆ្នាំមុន ប្រទេសចិន ក៏បានសម្រសម្រួលកិច្ចព្រមព្រៀងផ្សះផ្សាដ៏សំខាន់មួយរវាងអ៊ីរ៉ង់ និងអារ៉ាប៊ីសាអ៊ូឌីត បន្ទាប់ពីមានអរិភាពជាច្រើនឆ្នាំរវាងគូប្រជែងទាំងពីរ៕