ប្រទេសចិន នៅថ្ងៃព្រហស្បតិ៍ (ទី៣០ ខែឧសភា) នេះ បានប្រាប់អ្នករិះគន់អន្តរជាតិ ជុំវិញច្បាប់សន្តិសុខរបស់ហុងកុងឲ្យ «បញ្ឈប់ការជ្រៀតជ្រែក» បន្ទាប់ពីមានការថ្កោលទោស ចំពោះការចាប់ខ្លួនមនុស្ស ៧នាក់ ពាក់ព័ន្ធនឹងការបង្ហោះសារ «បង្កចលាចល» តាមប្រព័ន្ធអ៊ីនធឺណិត។

ជនទាំង ៧រូប ត្រូវបានចាប់ខ្លួនកាលថ្ងៃអង្គារ (ទី២៨ ខែឧសភា) និងថ្ងៃពុធ (ទី២៩ ខែឧសភា) ពីបទ «ប្រព្រឹត្តិបទល្មើស ពាក់ព័ន្ធនឹងការបំបះបំបោរ» ទាក់ទងនឹងការបង្ហោះតាមបណ្ដាញសង្គម ដែលរំលឹកដល់ការបង្រ្កាបរបស់ទីក្រុងប៉េកាំង នៅទីលាន Tiananmen Square (ធានអានមេន) ឆ្នាំ១៩៨៩។

ពួកគេគឺជាមនុស្សដំបូងគេដែលត្រូវបានចាប់ខ្លួនក្រោម «បទបញ្ញត្តិការពារសន្តិសុខជាតិ» ដែលត្រូវបានអនុម័តដោយទីក្រុងហុងកុង កាលពីខែមីនា ហើយត្រូវបានគេហៅជាទូទៅថា មាត្រា២៣ (Article 23 ) ដែលច្បាប់នេះតម្រូវឲ្យដាក់ទោសចំពោះបទល្មើសបះបោរ ដោយការដាក់ពន្ធនាគារ រហូតដល់ ៧ឆ្នាំ។

ពាក់ព័ន្ធនឹងចាប់ខ្លួននោះ សហភាពអឺរ៉ុប (EU) បាននិយាយថា ការចាប់ខ្លួននេះបង្ហាញថា ច្បាប់ថ្មី «ត្រូវបានប្រើ ដើម្បីរារាំងសេរីភាពនៃការបញ្ចេញមតិ»។

នៅថ្ងៃទី៣០ ខែឧសភានេះ ក្រសួងការបរទេសចិន ប្រចាំនៅទីក្រុងហុងកុង បានវាយប្រហារ ចំពោះរិះគន់អន្តរជាតិទាំងនោះ។ អ្នកនាំពាក្យក្រសួងប្រចាំទីក្រុងនេះ បាននិយាយថា៖ «យើងសូមផ្ដល់អនុសាសន៍ដល់ប្រទេសនីមួយៗ និងបណ្ដាអ្នកនយោបាយឲ្យប្រឈមជាមួយការពិត ដោយស្មើភាព ប្រកាន់ជំហរមិនលម្អៀង ហើយបញ្ឈប់ការជ្រៀតជ្រែក ក្នុងកិច្ចការរបស់ទីក្រុងហុងកុង និងកិច្ចការផ្ទៃក្នុងរបស់ប្រទេសចិនជាបន្ទាន់»។

ប្រមុខសន្តិសុខរបស់ទីក្រុងហុងកុង បាននិយាយថា ម្នាក់ក្នុងចំណោមអ្នកដែលត្រូវបានចាប់ខ្លួននោះ គឺលោកស្រី Chow Hang-tung ជាសកម្មជនដ៏លេចធ្លោម្នាក់ដែលបានដឹកនាំក្រុមដែលពេលនេះបែកខ្ញែកគ្នាអស់ហើយ និងដែលធ្លាប់បានរៀបចំការគោរពវិញ្ញាណក្ខន្ធប្រចាំឆ្នាំ ដើម្បីរំលឹកដល់ការបង្ក្រាបនៅទីលានធានអានមេន។

ការិយាល័យក្រសួងការបរទេសចិន បាននិយាយនៅថ្ងៃទី៣០ ខែឧសភានេះថា លោក Chow «បានបង្ហោះជាបន្តបន្ទាប់នូវសារដែលមានចេតនាបំបះបំបោរលើបណ្ដាញសង្គម ដោយព្យាយាមធ្វើឲ្យមានការស្អប់ខ្ពើមរបស់សាធារណជន ចំពោះរដ្ឋាភិបាលកណ្តាល និងរដ្ឋបាលទីក្រុងហុងកុង»៕