ក្រសួងពាណិជ្ជកម្មចិន បាននិយាយនៅថ្ងៃព្រហស្បតិ៍នេះថា ខ្លួននឹងរឹតបន្តឹងការនាំចេញឧបករណ៍ និង បច្ចេកវិទ្យាទាក់ទងនឹងអាកាសចរណ៍ និងលំហអាកាស ដែលចាប់ផ្តើមពីថ្ងៃទី ១ ខែកក្កដា។

សេចក្តីជូនដំណឹងមួយដែលបានឃើញកាលពីថ្ងៃព្រហស្បតិ៍នៅលើគេហទំព័ររបស់ក្រសួង បាននិយាយថា ចំណាត់ការនេះ គឺដើម្បីការពារសន្តិសុខ និងផលប្រយោជន៍ជាតិ និងបំពេញកាតព្វកិច្ចអន្តរជាតិដូចជាការមិនរីកសាយភាយអាវុធជាដើម។ ការនាំចេញវត្ថុដែលត្រូវបានកំណត់នៅក្រោមច្បាប់ថ្មី នឹងតម្រូវឲ្យមានអាជ្ញាប័ណ្ណនាំចេញ។

សេចក្តីប្រកាសនេះ ត្រូវបានចេញផ្សាយរួមគ្នាជាមួយរដ្ឋបាលទូទៅនៃគយរបស់ប្រទេសចិន និងនាយកដ្ឋានអភិវឌ្ឍន៍ឧបករណ៍របស់គណៈកម្មាធិការយោធាមជ្ឈិម។

សេចក្តីប្រកាសនោះ បានឲ្យដឹងថា ការត្រួតពិនិត្យការនាំចេញ នឹងអនុវត្តចំពោះម៉ាស៊ីនយន្តហោះ និងលំហអាកាស និងផ្នែករចនាសម្ព័ន្ធ គ្រឿងបរិក្ខារទាក់ទងនឹងការផលិតម៉ាស៊ីន កម្មវិធី (software) និងបច្ចេកវិទ្យា។ ពួកវាក៏នឹងរួមបញ្ចូលផងដែរនូវឧបករណ៍ ពុម្ព គ្រឿងបរិក្ខារ និងឧបករណ៍កែច្នៃផ្សេងទៀតដែលប្រើដើម្បីបង្កើតវត្ថុធាតុមួយចំនួនដូចជា សម្ភារៈធ្វើពីប្លាស្ទិកពិសេស ដែលមានសារធាតុទីតាញ៉ូមអាលុយមីញ៉ូម និងលោហៈធាតុផ្សំរបស់ពួកវា។

ទីក្រុងប៉េកាំង និងវ៉ាស៊ីនតោន បានផ្លាស់ប្តូរដើម្បីកំណត់ការនាំចេញផលិតផល បច្ចេកវិទ្យា និងឧបករណ៍ដែលចាត់ទុកថា មានសារៈសំខាន់ចំពោះសន្តិសុខជាតិ។ ប្រទេសចិន ក៏បានដាក់ទណ្ឌកម្មប្រឆាំងនឹងក្រុមហ៊ុនផលិតយន្តហោះ និងការពារជាតិមួយចំនួនរបស់សហរដ្ឋអាមេរិក ដើម្បីសងសឹកប្រឆាំងនឹងការលក់អាវុធទៅឲ្យតៃវ៉ាន់ ដែលជាកោះស្វ័យគ្រប់គ្រង ដែលខ្លួនអះអាងថា ជាទឹកដីរបស់ខ្លួន។