វិមានក្រឹមឡាំង នៅថ្ងៃព្រហស្បតិ៍ (ទី៣០ ខែឧសភា) នេះ បាននិយាយថា សហរដ្ឋអាមេរិក អង្គការណាតូ និងបណ្តាប្រទេសអឺរ៉ុបមួយចំនួន កំពុងជួយជំរុញអ៊ុយក្រែនឲ្យបន្តនូវអ្វីដែលខ្លួនហៅថា «សង្គ្រាមគ្មានវិចារណញ្ញាណ» របស់ទីក្រុងគីវជាមួយប្រទេសរុស្ស៊ី ហើយបានចោទប្រកាន់ពួកគេថា បានបង្កើនភាពតានតឹង ក្នុងប៉ុន្មានសប្តាហ៍ថ្មីៗនេះ។

គួរបញ្ជាក់ថា រុស្ស៊ីបានបញ្ជូនទាហានរាប់ម៉ឺននាក់ចូលទៅក្នុងអ៊ុយក្រែន កាលពីខែកុម្ភៈ ឆ្នាំ២០២២ ជាអ្វីដែលខ្លួនហៅថា ប្រតិបត្តិការយោធាពិសេស ហើយទីក្រុងគីវ និយាយថា ដោយមានជំនួយពីលោកខាងលិច ខ្លួនកំពុងការពារខ្លួន ក្នុងកិច្ចខិតខំប្រឹងប្រែង ដើម្បីបណ្តេញកងកម្លាំងរុស្ស៊ីទាំងអស់ឲ្យចេញពីទឹកដីរបស់ខ្លួន។ អ៊ុយក្រែននិយាយថា រុស្សីកំពុងប្រឹងប្រែងព្យាយាមបំផ្លាញទឹកចិត្ត និងឆន្ទៈប្រយុទ្ធរបស់ខ្លួន។

អ្នកនាំពាក្យវិមានក្រឹមឡាំង លោក Dmitry Peskov នៅថ្ងៃព្រហស្បតិ៍នេះ បានចោទប្រកាន់ប្រទេសលោកខាងលិចមួយចំនួនថា បានបង្កើនភាពតានតឹងក្នុងប៉ុន្មានសប្តាហ៍ថ្មីៗនេះ ដោយអនុញ្ញាតឲ្យអ៊ុយក្រែនប្រើប្រាស់អាវុធដែលពួកគេបានផ្គត់ផ្គង់ឲ្យ ប្រឆាំងនឹងគោលដៅនៅក្នុងប្រទេសរុស្ស៊ី ជាអ្វីមួយដែលសហរដ្ឋអាមេរិកមិនទាន់បានយល់ព្រមជាសាធារណៈឲ្យធ្វើដូច្នោះនៅឡើយទេ។

លោក Peskov បានប្រាប់អ្នកសារព័ត៌មានថា៖ «បណ្តាប្រទេសជាសមាជិកនៃសម្ព័ន្ធអាត្លង់ទិកខាងជើង ជាពិសេសសហរដ្ឋអាមេរិក និងរដ្ឋធានីនៅអឺរ៉ុបផ្សេងទៀត ក្នុងប៉ុន្មានថ្ងៃ និងសប្តាហ៍ថ្មីៗនេះ បានចាប់ផ្តើមធ្វើឲ្យភាពតានតឹងកើនឡើង»។

លោកបានបញ្ជាក់បន្ថែមថា៖ «ពួកគេកំពុងមានចេតនាធ្វើបែបនេះ។ យើងឮសេចក្ដីថ្លែងការណ៍បង្កជម្លោះជាច្រើន។ ពួកគេកំពុងជំរុញអ៊ុយក្រែនតាមគ្រប់មធ្យោបាយដែលអាចធ្វើទៅបាន ដើម្បីឲ្យបន្តសង្រ្គាមគ្មានវិចារណញ្ញាណនេះ»៕