លោក អាប់ដាឡា អាល់ ដាដារី(Abdallah Al Dardari) នាយកការិយាល័យប្រចាំតំបន់របស់អង្គការ UNDP សម្រាប់រដ្ឋអារ៉ាប់ បាននិយាយនៅក្នុងបទសម្ភាសន៍ជាមួយប្រព័ន្ធផ្សព្វផ្សាយ NHK នៅទីក្រុងតូក្យូ កាលពីថ្ងៃព្រហស្បតិ៍ថា មន្ត្រីជាន់ខ្ពស់នៃកម្មវិធីអភិវឌ្ឍន៍អង្គការសហប្រជាជាតិ(UNDP) បានអំពាវនាវឱ្យមានបទឈប់បាញ់បន្ទាន់ក្នុងការប្រយុទ្ធគ្នានៅតំបន់ហ្កាហ្សាស្ទ្រីប។ លោក ក៏បានស្វែងរកការគាំទ្រពីអន្តរជាតិ សម្រាប់កិច្ចខិតខំប្រឹងប្រែង ក្នុងការកសាងតំបន់នេះឡើងវិញ។

មន្ត្រីរូបនេះ បាននិយាយថា ទីភ្នាក់ងាររបស់លោក កំពុងធ្វើការដើម្បីផ្តល់ឱ្យប្រជាជននៅក្នុងតំបន់ហ្កាហ្សា នូវសេវាគ្រប់គ្រងកាកសំណល់រឹង និងទឹកស្អាតដែលគ្មានជាតិប្រៃ។ ប៉ុន្តែ លោក បាននិយាយថា ស្ថានភាពមានសភាពធ្ងន់ធ្ងរ ខណៈការវាយប្រហារដោយយោធាអ៊ីស្រាអែល បានសម្លាប់បុគ្គលិកអង្គការសហប្រជាជាតិ និងសមាជិកគ្រួសារ ឬបង្ខំពួកគេឲ្យជម្លៀសខ្លួនចេញម្តងហើយម្តងទៀត។

លោក Dardari និយាយថា គ្រប់ទិដ្ឋភាពនៃជីវិត បានរងផលប៉ះពាល់យ៉ាងខ្លាំង ឬត្រូវបែកបាក់គ្នា ហើយវាយឺតពេលហើយក្នុងការអនុវត្តបទឈប់បាញ់ ប៉ុន្តែវានៅតែល្អប្រសើរជាងគ្មានបទឈប់បាញ់។ វានឹងមានបញ្ហាប្រឈមច្រើនចំពោះការកសាងឡើងវិញ ប្រសិនបើបទឈប់បាញ់កើតមានឡើង។ លោក និយាយថា វានឹងរាប់បញ្ចូលទាំងការរៀបចំលំនៅឋានបណ្តោះអាសន្នរាប់ពាន់ខ្នង និងការយកកម្ទេចកម្ទីទៅបោះចោលចំនួន៣៨លានតោន។

លោក Dardari បានបញ្ជាក់ថា ការត្រៀមរៀបចំសម្រាប់ការកសាងឡើងវិញគួរតែចាប់ផ្តើម ទោះបីនៅមុនពេលការប្រយុទ្ធនឹងបញ្ចប់ក៏ដោយ។ លោក បានអំពាវនាវឱ្យសហគមន៍អន្តរជាតិ រួមទាំងប្រទេសជប៉ុន ប្រើប្រាស់ជំនាញរបស់ខ្លួនក្នុងកិច្ចខិតខំប្រឹងប្រែងកសាងឡើងវិញ។ លោក បានស្នើឱ្យប្រទេសជប៉ុន ចែករំលែកចំណេះដឹងរបស់ខ្លួនអំពីរបៀបដោះស្រាយឱ្យបានឆាប់រហ័សជាមួយកម្ទេចកម្ទី និងបច្ចេកវិទ្យារបស់ខ្លួន សម្រាប់ការកែច្នៃសំណល់ ប្រកបដោយប្រសិទ្ធភាព។