មន្ទីរកិច្ចការនារីខេត្តឧត្តរមានជ័យ បានរៀបចំវេទិការផ្សព្វផ្សាយស្តីពីការលើកកម្ពស់សីលធម៌សង្គម តម្លៃស្រ្តី និងគ្រួសារខ្មែរ ។ ពិធីនេះបានប្រព្រឹត្តិទៅក្រោមវត្តមានលោកស្រី មិន ធារី អភិបាលរងខេត្ត តំណាងឯកឧត្តមអភិបាលខេត្តឧត្តរមានជ័យ និងមានការអញ្ជើញចូលរួមពីស្ថាប័នពាក់ព័ន្ធ លោកគ្រូអ្នកគ្រូសិស្សានុសិស្សយ៉ាងច្រើនកុះករ នៅវិឡាល័យតេជោសែនសំរោង នាព្រឹកថ្ងៃទី៣១ ខែឧសភា ឆ្នាំ២០២៤នេះ។

ក្នុងវេទិកានោះដែរលោកស្រី មិន ធារី បានលើកឡើងថា វេទិការថ្ងៃនេះ គឺមានសារៈសំខាន់​ខ្លាំងណាស់ ក្នុងការអប់រំ ពាក់ព័ន្ធទៅនឹងបញ្ហាប្រឈមមួយចំនួន ដែលជាផលប៉ះពាល់ដល់យុវវ័យ ក្រុមគ្រួសារ និងសង្គមទាំងមូល។

លោកស្រីអភិបាលរងខេត្ត បានឲ្យដឹងថា ដើម្បីឆ្លើយតបទៅ និងបញ្ហាទាំងអស់នេះគឺទាមទារឲ្យ​យុវជន​ត្រូវធ្វើខ្លួនឲ្យទៅជាមនុស្សល្អខិតខំរៀន​សូត្រក្លាយជាមនុស្ស​ប្រកបដោយសីលធម៌ ដើម្បីជាប្រយោជន៍​នៅក្នុងសង្គម។ តាមរយៈការអបរំគឺជាកាតព្វកិច្ច​ដ៏ចាំបាច់​នៅក្នុងការអភិវឌ្ឍ​ធនធាន​មនុស្សដោយផ្តល់នូវការបណ្តុះបណ្តាលចំណេះដឹង ជំនាញ សមត្ថភាព កិត្តិយស សេចក្តីថ្លៃថ្នូរ ឥរិយាបថល្អ មានសុជីវធម៌ ​អត្តចរិត​ល្អ ​ដើម្បីជំរុញឲ្យយុវវ័យចេះស្រលាញ់ អត្តសញ្ញាណជាតិ និងវប្បធម៌ជាតិផងដែរ។

លោកស្រីអភិបាលរងខេត្ត បានបន្តថា បញ្ហានេះហើយបច្ចុប្បន្នរាជរដ្ឋាភិបាលកម្ពុជា សម្តេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា កំពុងបានយកចិត្តទុកដាក់គិតគូរខ្ពស់​ចំពោះប្អូនៗ​យុវវ័យដែល​កំពុងសិស្សា ​ត្រូវចេះស្រលាញ់វប្បធម៌​ប្រពៃណីអត្តសញ្ញាណខ្មែរ​មិនត្រូវមាន​ការ​ភ្លើតភ្លើន​តាម​វប្បធម៌​បរទេសនោះឡើយ ​ពិសេសត្រូវជៀសឲ្យឆ្ងាយ​ពីគ្រឿងញៀន៕