ភាគហ៊ុនរបស់ក្រុមហ៊ុនប្រព័ន្ធផ្សព្វផ្សាយ និងបច្ចេកវិទ្យា ត្រាំ (Trump Media & Technology Group) បានធ្លាក់ចុះ ៦,៥ ភាគរយកាលពីថ្ងៃព្រហស្បតិ៍ (៣០ ឧសភា) បន្ទាប់ពីគណៈវិនិច្ឆ័យទីក្រុងញូវយ៉ក បានផ្តន្ទាទោសលោកអតីតប្រធានាធិបតី ដូណាល់ ត្រាំ (Donald Trump) ពីបទក្លែងបន្លំឯកសារដើម្បីបិទបាំងការបង់ប្រាក់បំបិទមាត់តារាភាពយន្តអាសអាភាសនៅមុនការបោះឆ្នោតឆ្នាំ២០១៦។

ភាគហ៊ុនរបស់ក្រុមហ៊ុនមេ របស់បណ្ដាញសង្គម ទ្រូស សូសល់ (Truth Social) ដែលភាគច្រើនគ្រប់គ្រងដោយលោក ត្រាំ មួយនេះ បានជួញដូរនៅតម្លៃ ៤៨,៤៤ ដុល្លារប៉ុណ្ណោះ បន្ទាប់ពីបិទការទិញលក់ ដែលជាធម្មតាភាគហ៊ុនក្រុមហ៊ុននេះធ្លាប់បានបិទនៅតម្លៃ ៥១,១២ ដុល្លារ។

បន្ទាប់ពីការពិភាក្សាអស់រយៈពេលពីរថ្ងៃ គណៈវិនិច្ឆ័យដែលមានសមាជិក ១២ រូបបានប្រកាសថាខ្លួនបានរកឃើញថាលោក ត្រាំ មានទោសលើការចោទប្រកាន់ទាំង ៣៤ ករណីដែលលោកបានប្រឈម។ ប្រធានចៅក្រមយុត្តិធម៌ លោក វ័ន មើឆាន (Juan Merchan) បានកំណត់ការកាត់ទោសនៅថ្ងៃទី ១១ ខែកក្កដាដែលនឹងមានរយៈពេលប៉ុន្មានថ្ងៃប៉ុណ្ណោះមុនថ្ងៃទី១៥ ខែកក្កដា នៃពិធីមួយរបស់បក្សសាធារណរដ្ឋដែលរំពឹងថានឹងតែងតាំងលោក ត្រាំ ជាបេក្ខជនប្រធានាធិបតីជាផ្លូវការ។

នៅក្នុងការជួញដូរជាសាធារណៈដំបូងរបស់ក្រុមហ៊ុនប្រព័ន្ធផ្សព្វផ្សាយ ត្រាំ មីឌៀ (Trump Media) កាលពីថ្ងៃទី២៦ ខែមីនា ក្រុមអ្នកគាំទ្រលោក ត្រាំ បានសម្រុកទិញភាគហ៊ុនរបស់ក្រុមហ៊ុននេះដោយធ្វើឱ្យកើនឡើងរហូតដល់ ៥៩ ភាគរយ។

ក្រុមហ៊ុនបានរាយការណ៍ពីប្រាក់ចំណូលចំនួន ៧៧០.៥០០ ដុល្លារសម្រាប់ត្រីមាសខែមីនា និងការខាតបង់ក្នុងប្រតិបត្តិការចំនួន ១២,១ លានដុល្លារ៕