មនី្ទរសុខាភិបាលនៃរដ្ឋបាលរាជធានីភ្នំពេញ បន្តយុទ្ធនាការចាក់វ៉ាក់សាំងថ្មី ការពារជំងឺកញ្រ្ជិល និង​ស្អូច សម្រាប់កុមារទាំងស្រី ទាំងប្រុសអាយុពី៦ខែ រហូតដល់១៥ឆ្នាំ រួមនឹង​ការ​ចាក់​វ៉ាក់សាំង​ការពារ​ជំងឺ​១១មុខ ជូនកុមារ និងវ៉ាក់សាំងបង្ការជំងឺកូវីដ-១៩ផងដែរ។

បើតាមលោក សឿង កុសល ចៅសង្កាត់ផ្សារថ្មី៣ ខណ្ឌដូនពេញ បានប្រាប់BTV ព័ត៌មាន នា​ព្រឹក​ថ្ងៃ​ទី៣១ ខែឧសភា ឆ្នាំ២០២៤នេះថា ថ្ងៃនេះពិតជាមានសេចកី្តរីករាយណាស់ ដែល​បាន​ចូលរួម​សហការ​ជាមួយមនី្ទរសុខាភិបាលរាជធានីភ្នំពេញ ដែលបានចុះ​មក​ដល់​ផ្តល់​វ៉ាក់​សាំង​ថ្មី​ការពារ​ជំងឺ​កញ្រ្ជិល និងស្អូច និងវ៉ាក់សាំងការពារជំងឺ១១មុខ រួមនិងវីតាមីនA ថ្នាំបញ្ចុះព្រូន និងចាក់​វ៉ាក់សាំង​បង្ការ​ជំងឺ​កូវីដ-១៩។

លោក គិត សេដ្ឋា អនុប្រធានការិយាល័យសុខាភិបាលសុ្រកប្រតិបតិ្តចតុមុខ មនី្ទរ​សុខាភិបាល នៃ​រដ្ឋបាល​រាជ​ធានី​ភ្នំពេញ បានឲ្យដឹងថា យុទ្ធនាការចាក់វ៉ាក់សាំងថ្មី ការពារជំងឺកញ្រ្ជិល និងស្អូច សម្រាប់​​កុមារទាំងស្រី ទាំងប្រុសអាយុពី៦ខែ រហូតដល់១៥ឆ្នាំ បានចាប់ផ្តើមតាំងពីថ្ងៃទី២១ ខែ​ឧសភា នៅទូទាំងរាជធានីភ្នំពេញ។ ជាក់ស្តែងព្រឹកនេះ ក្រុមការងារគ្រូពេទ្យ ចុះផ្តល់វ៉ាក់សាំង ក្នុង​សង្កាត់​ចំនួន​៣ ក្នុងមូលដ្ឋានខណ្ឌដូនពេញ គឺសង្កាត់ផ្សារថ្មី៣ សង្កាត់ចតុមុខ និងសង្កាត់​ជ័យជំនៈ​។

ឯកឧត្តមវេជ្ជបណ្ឌិត ងី មានហេង ប្រធានមនី្ទរសុខាភិបាលរាជធានីភ្នំពេញ បានបញ្ជាក់ថា យុទ្ធនា​ការ​ផ្តល់វ៉ាក់សាំងថ្មីនេះ ធ្វើឡើងចាប់តាំងពីថ្ងៃទី២១ ខែឧសភា រហូតដល់ថ្ងៃទី៣១ ខែ​ឧសភា ឆ្នាំ២០២៤ នៅតាមភូមិគោលដៅ ដែលជាភូមិមានហានិភ័យខ្ពស់ នៃការយកកុមារ ទៅ​ចាក់​វ៉ាក់​សាំងបង្ការជំងឺមិនគ្រប់គ្រាន់ (ក្នុងករណីមាតា បិតា អាណាព្យាបាលជាប់រវល់ ដោយ​យក​កូនៗ​ទៅ​ចាក់វ៉ាក់សាំងមិនគ្រប់) ក្នុងនោះមានភូមិចំនួន២៥៤ភូមិ ក្នុងចំណោម​ជាង​៩០០​ភូមិ​ទូទាំង​រាជ​ធានីភ្នំពេញ៕ អត្ថបទ រដ្ឋា