កំពង់ស្ពឺ ÷ ផ្លូវជនបទ ដែលស្ថាបនាស្ថិតក្រោមក្របខណ្ឌក្រសួងអភិវឌ្ឍន៍ជនបទ បានផ្តល់អត្ថប្រយោជនជាច្រើន ជាពិសេសការតភ្ជាប់ ទៅកាន់តំបន់ផ្សេងៗ ការសម្រួលធ្វើដំណើរប្រជាពលរដ្ឋមូលដ្ឋាន និងសាធារណជនទូទៅ និងការដឹកជញ្ជូនកសិផលជាដើម ។

ឯកឧត្តម អ៊ិន ចន្ថា រដ្ឋលេខាធិការ តំណាងដ៏ខ្ពង់ខ្ពស់ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ នៅថ្ងៃទី ៣១ ខែ ឧសភា ឆ្នាំ ២០២៤ នេះ បានដឹកនាំក្រុមការងារអន្តរក្រសួង ចុះត្រួតពិនិត្យ វាយតម្លៃប្រគល់-ទទួលបញ្ចប់ជាស្ថាពររយៈពេលធានា សុពលភាពការងារស្ថាបនាផ្លូវក្រាលបេតុងចំនួន ៣ ខ្សែ ប្រវែងសរុប ១ ៤៦០ ម៉ែត្រ, ខ្សែទី១ មានប្រវែង ៧០០ ម៉ែត្រ ទទឹង ៥ ម៉ែត្រ, ខ្សែទី២ និងខ្សែទី៣ មានប្រវងសរុប ៧៦០ ម៉ែត្រ ទទឹង ៤ ម៉ែត្រ, ស្ថិតនៅភូមិត្រពាំងឫស្សី ឃុំសំបូរ ភូមិរំដួល និងភូមិថ្កូវ ក្នុងឃុំ ត្រពាំងគង ស្រុកសំរោងទង ខេត្តកំពង់ស្ពឺ។

ទាក់ទងគម្រោងផ្លូវខាងលើនេះ, ឯកឧត្តម បានឯកភាព និងវាយតម្លៃខ្ពស់ ចំពោះការខិតខំប្រឹងប្រែងអនុវត្តទៅតាមផែនការ ស្របតាមបទដ្ឋានបច្ចេកទេសបានត្រឹមត្រូវ, ព្រោះផ្លូវមានសារៈសំខាន់ណាស់ និងជាសរសៃរឈាមនៃសេដ្ឋកិច្ច មិនថានៅជនបទ ទីប្រជុំជន ឬនៅទីក្រុងឡើយ។ ជុំវិញបញ្ហាហេដ្ឋរចនាសម្ព័ន្ធនេះដែរ នៅក្នុងអាណត្តិទី ៧ នៃរដ្ឋសភា, រាជរដ្ឋាភិបាលកម្ពុជា នឹងបន្តការ គាំទ្រដល់ការជួសជុល ថែទាំផ្លូវ ស្ពាន និងផ្លូវជនបទ ព្រមទាំងការស្តារស្រះនិងជីកស្រះ អណ្តូងទឹក ដើម្បីទប់ទល់និងភាពរាំស្ងួត និង ទឹកជំនន់ជាដើម។

ជុំវិញផ្លូវនេះដែរ, ឯកឧត្តម អ៊ិន ចន្ថា បានសំណូមពរដល់អាជ្ញាធរមូលដ្ឋាន ត្រូវសហការណែនាំ និងបំផុសប្រជាពលរដ្ឋ ឱ្យចូលរួមថែទាំផ្លូវ និងសំណង់សិល្បការ្យខាងលើ ដោយមានការយាមកាមយ៉ាងហ្មត់ចត់ និងកុំឱ្យមានរថយន្តដឹកទំនិញលើសចំណុះ ធ្វើចរាចរលើផ្លូវ ធ្វើយ៉ាងរក្សាគុណភាពផ្លូវនេះឱ្យបានគង់វង្ស យូរអង្វែង និងចាត់ទុកថាផ្លូវនេះជារបស់យើងគ្រប់ៗគ្នា៕

អត្ថបទ៖ សុន រ៉ាឌី