បាល់ទាត់៖ ​ក្លិប​​អង់គ្លេស Tottenham Hotspur ត្រូវបាន​គេ​ដឹងថា ​ឈានដល់​កិច្ចព្រមព្រៀង​ទិញ​ខ្សែប្រយុទ្ធ​អា​ហ្ស​ង់​ទីន Lautaro Martinez ពី Inter Milan ក្នុងតម្លៃ​បំបែក​កំណត់ត្រា​ក្លិប នេះ​បើ​យោងតាម​ការចុះផ្សាយ​រប​ស់​សារព័ត៌មាន The Time​។​

​តម្លៃ​នៃ​ការផ្ទេរ​នេះ​ត្រូវបាន​កាសែត The Time ដដែល​បញ្ជាក់ថា ​មានតម្លៃ ៦០លាន​ផោន​ដែលជា​តម្លៃ​ខ្ពស់បំផុតបំបែក​កំណត់ត្រា​របស់​ក្លិប​។​ ​ដំណឹង​នេះ​ក៏បាន​បញ្ចប់​ចំណាប់អារម្មណ៍​របស់​ក្រុម​កាំភ្លើង​ធំ Arsenal ផងដែរ​ដែល​កំពុង​ព្យាយាម​ចរចា​យក​កីឡាករ​វ័យ ២៣ឆ្នាំ​រូបនេះ​ទៅកាន់ Emirate Stadium​។​ ​កីឡាករ​អា​ហ្ស​ង់​ទីន​រូបនេះ​ត្រូវបាន​គេ​ដឹងថា អាច​នឹង​មក​ជំនួស​តំណែង​ខ្សែប្រយុទ្ធ​អង់គ្លេស Harry Kane ដែល​កំពុងមាន​អនាគត​ស្រពិចស្រពិល​ជាមួយ​ក្លិប រឺក៏​អ្នក​ទាំងពីរ​អាចជា​ដៃគូ​ប្រយុទ្ធ​នឹង​គ្នា​ក្នុង​លក្ខខណ្ឌ Spurs លក់ Harry Kane មិន​ចេញ​។

​​ចំណែកឯ Inter Milan ប្រសិន Lautaro Martinez ពិតជា​ចាកចេញ​មែន​នោះមានន័យថា ​ក្រុម​ការពារ​តំណែង​ជើងឯក​អ៊ីតាលី Serie A មួយ​នេះ​នឹង​បាត់បង់​កីឡាករ​ប្រយុទ្ធ​សំខាន់ ២រូប បន្ទាប់ពី​ខ្សែប្រយុទ្ធ​ប៊ែ​ល​ហ្ស៊ិ​ក Romelu Lukaku ខិតជិត​ផ្ទេរ​ត្រលប់​ទៅកាន់ Chelsea៕

​អត្ថបទ​៖​នាង សុភា​វុ​ធ