រដ្ឋមន្ត្រីការពារជាតិអ៊ីស្រាអែល លោក យ៉ាវ ហ្គាលេន(Yoav Gallant) បាននិយាយថា ប្រទេសនេះមានព័ត៌មានជាក់លាក់ទាក់ទងទៅនឹងចំណាប់ខ្មាំង ដែលត្រូវបានឃុំខ្លួននៅទីក្រុង Rafah ភាគខាងត្បូង តំបន់ហ្កាហ្សា ហើយបានបញ្ជាក់ពីសារៈសំខាន់នៃប្រតិបត្តិការយោធានៅទីក្រុងនេះ។ ក្រសួងការពារជាតិអ៊ីស្រាអែល បាននិយាយកាលពីថ្ងៃព្រហស្បតិ៍ថា លោក Gallant បានជួបសន្ទនាតាមទូរស័ព្ទជាមួយរដ្ឋមន្ត្រីការពារជាតិសហរដ្ឋអាមេរិក លោក Lloyd Austin ។

យោធាអ៊ីស្រាអែល បានប្រកាសថា កងកម្លាំងរបស់ខ្លួន ដណ្តើមបានការគ្រប់គ្រងច្រករបៀង ហ្វីឡាដែលហ្វីយ៉ា(Philadelphia) ដែនដីតំបន់ហ្កាហ្សាប្រវែងប្រហែល១៤គីឡូម៉ែត្រ នៅតាមព្រំដែនរវាងតំបន់ហ្កាហ្សា និងប្រទេសអេហ្ស៊ីប។ អ៊ីស្រាអែល អះអាងថា សព្វាវុធ និងទំនិញផ្សេងទៀត កំពុងត្រូវបានរត់ពន្ធពីប្រទេសអេហ្ស៊ីប ទៅកាន់តំបន់ហ្កាហ្សា តាមរយៈតំបន់នោះ ហើយកងទ័ពរបស់ខ្លួន បានរកឃើញផ្លូវរូងក្រោមដីប្រហែល២០កន្លែង នៅទីនោះ និងកំពុងធ្វើការ ស្ទង់មើល បំផ្លាញផ្លូវរូងទាំងនេះ។

ជាមួយគ្នានេះ អាជ្ញាធរសុខាភិបាលតំបន់ហ្កាហ្សា បាននិយាយកាលពីថ្ងៃព្រហស្បតិ៍ថា ពួកគេបានបញ្ជាក់ពីអ្នកស្លាប់ចំនួន៥៣នាក់នៅក្នុងនិងជុំវិញតំបន់ក្នុងរយៈពេល២៤ម៉ោងកន្លងទៅនេះ។

អាជ្ញាធរបាននិយាយថាចំនួនអ្នកស្លាប់នៅហ្កាហ្សា ចាប់តាំងពីការចាប់ផ្តើមការវាយលុករបស់អ៊ីស្រាអែលនៅថ្ងៃទី៧ ខែតុលា បានកើនឡើងដល់ ៣៦.២២៤នាក់ ។

កម្មវិធីស្បៀងអាហារពិភពលោក បាននិយាយកាលពីថ្ងៃព្រហស្បតិ៍ថា ខ្លួនអាចធ្វើសកម្មភាពបានបន្តិចបន្តួចប៉ុណ្ណោះ នាពេលបច្ចុប្បន្ននៅទីក្រុង Rafah ដោយស្តុកនៃការផ្គត់ផ្គង់មនុស្សធម៌មានទាបបំផុត ហើយការចល័តត្រូវបានរឹតត្បិតយ៉ាងខ្លាំង។ ទីភ្នាក់ងារអង្គការសហប្រជាជាតិ ក៏បាននិយាយផងដែរថា នៅភាគកណ្តាល និងភាគខាងត្បូងតំបន់ហ្កាហ្សា កម្រិតនៃភាពអត់ឃ្លាន កំពុងកើនឡើងយ៉ាងឆាប់រហ័ស ហើយបានអំពាវនាវឱ្យអាជ្ញាធរអ៊ីស្រាអែល ជួយសម្រួលដល់ការដឹកជញ្ជូនការផ្គត់ផ្គង់មនុស្សធម៌។