ទូរទស្សន៍ al-Masirah TV របស់ក្រុមហ៊ូទី បានរាយការណ៍ថា យន្តហោះចម្បាំងរបស់សហរដ្ឋអាមេរិក និងអង់គ្លេស បានបើកការវាយប្រហារតាមអាកាសចំនួន៦លើក ទៅលើរដ្ឋធានីសាណា(Sanaa) នៅយេម៉ែន គ្រប់គ្រងដោយក្រុមហ៊ូទី កាលពីយប់ថ្ងៃព្រហស្បតិ៍។

ទូរទស្សន៍របស់ក្រុមហ៊ូទី និយាយថា ការវាយប្រហារតាមអាកាសចំនួនបីលើក បានវាយប្រហារនៅតំបន់ភ្នំ al-Nahdayn នៅទីក្រុង ដែលការវាយប្រហារតាមអាកាសមួយលើកបានធ្លាក់នៅជិតអាកាសយានដ្ឋានសាណា ភាគខាងជើងទីក្រុង ហើយការវាយប្រហារបន្ថែមទៀតចំនួនពីរលើក បានវាយប្រហារតំបន់ Jarban ក្នុងស្រុក Sanhan នៅចុងភាគខាងត្បូងទីក្រុងសាណា។

យោងតាមទូរទស្សន៍របស់ក្រុមហ៊ូទី បានឱ្យដឹងថា យន្តហោះចម្បាំងក្រុមចម្រុះអាមេរិក-អង់គ្លេស ក៏បានវាយប្រហារតាមអាកាសជាច្រើនដង ទៅលើទីក្រុងកំពង់ផែសមុទ្រក្រហម Hodeidah ដែលគ្រប់គ្រងដោយក្រុមហ៊ូទី។ ប្រជាជន នៅក្នុងទីក្រុងសាណា និងទីក្រុងកំពង់ផែ Hodeidah បាននិយាយថា ពួកគេបានឮសំឡេងយន្តហោះចម្បាំងហោះនៅពីលើក្បាលនៅពេលយប់ ហើយក្រោយមកមានការផ្ទុះដ៏ខ្លាំង នៅក្នុងទីតាំងយោធាច្រើនកន្លែង ដែលគ្រប់គ្រងដោយក្រុមហ៊ូទី។

កាលពីខែវិច្ឆិកាឆ្នាំមុន ក្រុមឧទ្ទាមហ៊ូទី បានចាប់ផ្តើមបាញ់មីស៊ីលបាលីស្ទីកប្រឆាំងនាវា និងយានដ្រូន ដែលដាក់គោលដៅលើអ្វីដែលពួកគេបាននិយាយថា ជានាវាមានទំនាក់ទំនងជាមួយអ៊ីស្រាអែល ឆ្លងកាត់សមុទ្រក្រហម ដើម្បីបង្ហាញពីសាមគ្គីភាពជាមួយពលរដ្ឋប៉ាឡេស្ទីន នៅតំបន់ហ្កាហ្សាស្ទ្រីប។

ជាការឆ្លើយតប ក្រុមចម្រុះកងទ័ពជើងទឹកអាមេរិក-អង់គ្លេស ដែលមានមូលដ្ឋាននៅលើដែនទឹកនោះ ចាប់តាំងពីខែមករា មក បានវាយឆ្មក់តាមអាកាសជាទៀងទាត់ និងបានវាយប្រហារដោយមីស៊ីល ទៅលើគោលដៅរបស់ក្រុមហ៊ូទី ដើម្បីរារាំងក្រុមនេះ ប៉ុន្តែបានត្រឹមតែនាំទៅដល់ការពង្រីកកាន់តែធំការវាយប្រហាររបស់ក្រុមហ៊ូទី ដែលរួមមានទាំងនាវាពាណិជ្ជកម្ម និងនាវាកងទ័ពជើងទឹកអាមេរិក និងអង់គ្លេស។