មន្ទីរពេទ្យដែលព្យាបាលលោក Robert Fico នៅថ្ងៃសុក្រ បានប្រាប់ឲ្យដឹងថា នាយករដ្ឋមន្រ្តីស្លូវ៉ាគីរូបនេះ បានទៅទទួលការថែទាំ នៅគេហដ្ឋានវិញ ដោយផ្លាស់ចេញពីមន្ទីរពេទ្យ នៅកណ្តាលទីក្រុង Banska Bystrica ជាកន្លែងដែលលោកបានជាសះស្បើយពីការប៉ុនប៉ងធ្វើឃាត។

គួរបញ្ជាក់ថា អ្នកវាយប្រហារម្នាក់ បានបាញ់លោក Fico ចំនួនបួនគ្រាប់ នៅទីតាំងដ៏កៀក នៅពេលដែលលោកនាយករដ្ឋមន្ត្រី បានស្វាគមន៍អ្នកគាំទ្រ នៅឯកិច្ចប្រជុំរដ្ឋាភិបាលមួយ នាកណ្តាលទីក្រុង Handlova របស់ប្រទេសស្លូវ៉ាគី កាលពីថ្ងៃទី១៥ ខែឧសភា។

ការវាយប្រហារនោះបានធ្វើឲ្យលោក Fico វ័យ ៥៩ឆ្នាំ ស្ថិតក្នុងស្ថានភាពធ្ងន់ធ្ងរ ហើយត្រូវការវះកាត់រយៈពេល ៥ម៉ោង និងម្ដងទៀត នៅ ២ថ្ងៃក្រោយមក។

ខ្មាន់កាំភ្លើង ដែលត្រូវបានបង្ហាញអត្តសញ្ញាណឈ្មោះ Juraj C. វ័យ ៧១ឆ្នាំ ត្រូវបានឃាត់ខ្លួននៅនឹងកន្លែង ហើយត្រូវបានចោទប្រកាន់ពីបទប៉ុនប៉ងឃាតកម្មគិតទុកជាមុន។

ហេតុការណ៍នោះ ដែលជាការប៉ុនប៉ងធ្វើឃាតដ៏ធំលើកដំបូងលើមេដឹកនាំនយោបាយអឺរ៉ុបអស់រយៈពេលជាង ២០ឆ្នាំនោះ បានបង្ហាញពីភាពបែកបាក់ខាងនយោបាយយ៉ាងស៊ីជម្រៅ នៅក្នុងប្រទេសអឺរ៉ុបកណ្តាល ដែលមានប្រជាជន ៥,៤លាននាក់៕