ក្រុមស្ម័គ្រចិត្តប៉ាឡេស្ទីន បានចំអិន និងចែកចាយចំណីអាហារដល់អ្នកដែលស្រេកឃ្លានខ្លាំងនៅទីក្រុង Younis និងអ្នកដែលបានវិលត្រឡប់ទៅកាន់ផ្ទះសម្បែងរបស់ពួកគេវិញ ក្រោយការជម្លៀសខ្លួនអស់រយៈពេលរាប់ខែនៅក្នុងតំបន់ហ្កាហ្សា ។

 អ្នកស្ម័គ្រចិត្តប៉ាឡេស្ទីនម្នាក់នៅកន្លែងចែកចាយអាហារដែលបានបង្ហាញការខកចិត្តរបស់គាត់ និយាយថា បើទោះបីជាជំនួយបានមកពីផែសាងសង់ឡើងដោយសហរដ្ឋអាមេរិកក៏ដោយ ការវាយប្រហារលើដែនដីបិទច្រកមួយមួយនេះ នៅតែបន្តកើតមានដដែល ។

 លោក Abu Jihad Awdeh គឺជាជនប៉ាឡេស្ទីនមួយរូបរស់នៅក្នុងទីក្រុង Khan Younis និយាយថា ស្របពេលដែលជនប៉ាឡេស្ទីនជម្លៀសខ្លួនបានវិលត្រឡប់ទៅកាន់ផ្ទះសម្បែងរងការបំផ្លិចបំផ្លាញរបស់ពួកគេវិញ ក្រោយកងទ័ពអ៊ីស្រាអែលដកចេញពីទីក្រុង Khan Younis ពួកគេនៅតែប្រឈមការងារលំបាកក្នុងការស្វែងរកតម្រូវការចាំបាច់របស់ពួកគេ ដោយសារគ្មានទឹកស្អាត ទឹកស្អុយ និងពុំមានសេវាកម្មមូលដ្ឋាន ។

 យោងតាមអង្គការជំនួយនានាបានឲ្យដឹងថា មនុស្សប្រហែល ១,៧លាននាក់ បានចាកចេញពីផ្ទះសម្បែងរបស់ពួកគេ ។

 ក្រុមមន្រ្តីប៉ាឡេស្ទីន បាននិយាយថា យោធាអ៊ីស្រាអែល បានដកចេញបំរាមលក់ស្បៀងអាហារដល់តំបន់ហ្កាហ្សាចេញពីអ៊ីស្រាអែល និងតំបន់កាន់កាប់វ៉េសប៊ែង ស្របពេលដែលការវាយលុករបស់ពួកគេធ្វើឲ្យរាំងស្ទះដល់លំហូរជំនួយអន្តរជាតិ ។

 កងទ័ពបានបើកភ្លើងខៀវដល់ក្រុមឈ្មួញហ្កាហ្សាឲ្យចាប់ផ្តើមការទិញទំនិញរបស់ពួកគេពីអ៊ីស្រាអែល និងក្រុមផ្គត់ផ្គង់ស្បៀងអាហារប៉ាឡេស្ទីន ដូចជាផ្លែឈើស្រស់ បន្លែស្រស់ និងទឹកដោះគោ ក្នុងខែនេះ រយៈពេលប៉ុន្មានថ្ងៃក្រោយកងកម្លាំងអ៊ីស្រាអែលវាយលុកទីក្រុងភាគខាងត្បូង Rafah ។

 ក្រសួងសុខាភិបាលប៉ាឡេស្ទីនគ្រប់គ្រងដោយក្រុមហាម៉ាស់ និយាយថា ជនប៉ាឡេស្ទីនជាង ៣៦.០០០នាក់ ត្រូវបានសម្លាប់ដោយសារសង្រ្គាមផ្លូវអាកាស និងផ្លូវគោករបស់អ៊ីស្រាអែលនៅទូទាំងតំបន់ហ្កាហ្សា ក្នុងនោះ មនុស្ស ៥៣នាក់ ត្រូវបានសម្លាប់អំឡុងរយៈពេល ២៤ម៉ោងចុងក្រោយនេះ ៕