ក្រសួងការបរទេសប៉ាគីស្ថាន នៅថ្ងៃសុក្រ (ទី៣១ ខែឧសភា) នេះ បាននិយាយថា នាយករដ្ឋមន្ត្រីលោក Shehbaz Sharif នឹងបំពេញទស្សនកិច្ចទៅកាន់ប្រទេសចិន ចាប់ពីថ្ងៃទី៤ ដល់ថ្ងៃទី៨ ខែមិថុនា តាមការអញ្ជើញរបស់ប្រធានាធិបតី លោក Xi Jinping។

ការវិនិយោគ និងជំនួយហិរញ្ញវត្ថុរបស់ចិន ចាប់តាំងពីឆ្នាំ២០១៣ មក បានក្លាយជាគន្លឹះដ៏សំខាន់ ក្នុងការជួយទ្រទ្រង់សេដ្ឋកិច្ចដែលកំពុងជួបការលំបាករបស់ប្រទេសអាស៊ីខាងត្បូងមួយនេះ ក្នុងនោះរួមទាំងការពន្យារពេលដល់ប្រាក់កម្ចី ដើម្បីឲ្យទីក្រុងអ៊ីស្លាម៉ាបាដ អាចបំពេញតម្រូវការហិរញ្ញប្បទានខាងក្រៅ នៅពេលដែលទុនបម្រុងបរទេសមានកម្រិតទាបខ្លាំង។

អ្នកនាំពាក្យការិយាល័យបរទេសលោកស្រី Mumtaz Baloch បាននិយាយនៅក្នុងសន្និសីទសារព័ត៌មានថា ដំណើរទស្សនកិច្ចនេះ នឹងស្វែងរកការធ្វើឲ្យប្រសើរឡើងនូវកិច្ចសហប្រតិបត្តិការ ក្រោមច្រករបៀងសេដ្ឋកិច្ចចិន-ប៉ាគីស្ថាន (CPEC) តម្លៃរាប់ពាន់លានដុល្លារ ដែលជាផ្នែកដ៏សំខាន់នៃគំនិតផ្តួចផ្តើមខ្សែក្រវាត់ និងផ្លូវរបស់ទីក្រុងប៉េកាំង។

លោកស្រី Baloch បានប្រាប់ថា៖ «ទិដ្ឋភាពសំខាន់នៃដំណើរទស្សនកិច្ចរបស់លោកនាយករដ្ឋមន្ត្រី នឹងជាកិច្ចប្រជុំជាមួយនាយកប្រតិបត្តិសាជីវកម្មនៃក្រុមហ៊ុនឈានមុខគេរបស់ប្រទេសចិន ទាក់ទងនឹងប្រេង និងឧស្ម័ន ថាមពល ICT និងបច្ចេកវិទ្យាដែលកំពុងរីកចម្រើនផ្សេងទៀត»។

ជាមួយគ្នានេះ លោកស្រី Baloch បានបន្ថែមថា លោក Sharif នឹងជួបជាមួយប្រធានាធិបតី លោក Xi ហើយនិងធ្វើកិច្ចពិភាក្សាកម្រិតគណៈប្រតិភូជាមួយនាយករដ្ឋមន្ត្រីលោក Li Qiang។

ការផ្ដល់ព័ត៌មានពីដំណើរទស្សនកិច្ចរបស់លោក Sharif នេះ កើតឡើងប៉ុន្មានថ្ងៃបន្ទាប់ពីប៉ាគីស្ថានបានប្រកាសថា អាជ្ញាធរបានចាប់ខ្លួនពួកសកម្មប្រយុទ្ធឥស្លាមចំនួន ១១នាក់ ពាក់ព័ន្ធនឹងការបំផ្ទុះគ្រាប់បែក ដែលសម្លាប់វិស្វករចិន ៦នាក់ កាលពីខែមីនា។ ទីក្រុងអ៊ីស្លាម៉ាបាដបាននិយាយថា ក្រុមសកម្មប្រយុទ្ធបានប្រតិបត្តិការចេញពីប្រទេសអាហ្វហ្គានីស្ថាន ប៉ុន្តែទីក្រុងកាប៊ុលបានច្រានចោលការចោទប្រកាន់នេះ៕