ក្រុមមន្រ្តីក្នុងស្រុកនិយាយនៅថ្ងៃព្រឹកថ្ងៃសុក្រនេះថា មីស៊ីលរុស្ស៊ី បានវាយប្រហារទីតាំង ៣កន្លែងនៅទីក្រុង Kharkiv ដែលជាទីក្រុងធំបំផុតទី ២របស់អ៊ុយក្រែន ដោយបានសម្លាប់មនុស្សយ៉ាងហោច ៣នាក់ និងមនុស្ស ១៦នាក់ផ្សេងទៀត រងរបួស ។

 ការវាយប្រហារដោយមីស៊ីលនេះដែរ ត្រូវចំប្លុកផ្ទះល្វែងកម្ពស់ ៥ជាន់មួយខ្នង ហាងនៅក្នុងអគារកម្ពស់ ៣ជាន់មួយកន្លែង និងរោងចក្រកាត់ដេរមួយកន្លែង ។

 ក្រុមភ្នាក់ងារពន្លត់អគ្គិភ័យ បានព្យាយាមពន្លត់ភ្លើងនៅក្នុងអគារមួយខ្នងក្នុងចំណោមអគាររងការខូចខាត និងបានព្យាយាមជម្លៀសមនុស្សចេញ ខណៈដែលអ្នកស្រុកជាច្រើននិយាយថា សមាជិកគ្រួសារពួកគេជាច្រើន នៅបាត់ខ្លួន ។

 លោក Oleh Syniehubov គឺជាអភិបាលក្នុងតំបន់និយាយថា កុមារ ២នាក់ ស្ថិតក្នុងចំណោមអ្នករងរបួសនៅក្នុងការវាយប្រហារនេះ ហើយលោកបានព្រមានថា មនុស្សជាច្រើននាក់ទៀត អាចនឹងជាប់ខ្លួននៅក្រោមគំនរកម្ទេចកម្ទី ។

 លោកថា ការវាយប្រហារនេះ បានកើតឡើងនៅយប់រំលងអធ្រាត្រ ហើយយោងតាមព័ត៌មានបឋម បានឲ្យដឹងថា មីស៊ីល S-300 ត្រូវបានប្រើប្រាស់ ។

ទីក្រុងម៉ូស្គូ បានច្រានចោលទាំងស្រុងចំពោះការវាយប្រហារដោយចេតនាណាមួយលើគោលដៅស៊ីវិល ។ មនុស្សរាប់ម៉ឺននាក់ បានស្លាប់ និងរងរបួស ចាប់តាំងពីការវាយលុករបស់រុស្ស៊ីលើអ៊ុយក្រែន កាលពីខែកុម្ភៈ ឆ្នាំ ២០២២ ៕