លោក Ivan Timofeev អគ្គនាយកនៃក្រុមប្រឹក្សាកិច្ចការអន្តរជាតិរុស្ស៊ី (RIAC) បានប្រាប់ទីភ្នាក់ងារសារព័ត៌មាន TASS ថា លទ្ធភាពនៃការផ្ទុះឡើងនូវសង្គ្រាមទ្រង់ទ្រាយធំ រវាងរុស្ស៊ី និងលោកខាងលិច កំពុងកើនឡើងជាលំដាប់ ប៉ុន្តែវាមិនមែនជាបញ្ហា ដែលចៀសមិនបាននោះឡើយ។

នៅមុនសន្និសីទអន្តរជាតិមួយដែលមានចំណងជើងថា «រុស្ស៊ី និងចិន ក្នុងបរិបទកិច្ចសហប្រតិបត្តិការយុគសម័យថ្មី» លោក Timofeev បានចង្អុលបង្ហាញថា៖ «សង្គ្រាមទ្រង់ទ្រាយធំ មិនមែនជាការសន្និដ្ឋានទុកជាមុននោះទេ ប៉ុន្តែគួរឲ្យសោកស្ដាយ លទ្ធភាពរបស់វាកំពុងកើនឡើងជាលំដាប់»។ លោកបានបន្ថែមថា៖ «ជម្រើសមួយ គឺថា នឹងមានការកើនឡើងយ៉ាងខ្លាំងនៅក្នុងការប្រឈមមុខដាក់គ្នា រវាងពួកយើង។ ឫសគល់នៃការប្រឈមមុខនេះ គឺបញ្ហាអ៊ុយក្រែន ខណៈដែលលោកខាងលិចនៅតែបន្តផ្តល់ជំនួយផ្នែកយោធាទ្រង់ទ្រាយធំដល់ទីក្រុងគីវ»។

បើយោងតាមការលើកឡើងរបស់លោក លទ្ធភាពដែលកំពុងលេចចេញនៃការកើនឡើងនូវភាពតានតឹង នៅក្នុងជម្លោះអ៊ុយក្រែន រួមបញ្ចូលនូវការប៉ះទង្គិចដោយផ្ទាល់ រវាងរុស្ស៊ី និងលោកខាងលិច។ មន្ត្រីមួយចំនួន ជាពិសេសពីប្រទេសបារាំង និងចក្រភពអង់គ្លេស បាននិយាយថា អង្គភាពយោធាបុគ្គលពីបណ្ដាប្រទេសសមាជិករបស់អង្គការណាតូ អាចនឹងត្រូវបានដាក់ពង្រាយទៅកាន់ប្រទេសអ៊ុយក្រែន ហើយលោក Timofeev ពន្យល់ថា ប្រសិនបើពួកគេចូលរួមក្នុងប្រតិបត្តិការយោធាប្រឆាំងនឹងកងកម្លាំងរុស្ស៊ីនោះ ពួកគេនឹងក្លាយជាគោលដៅស្របច្បាប់ សម្រាប់កងទ័ពរបស់យើង។

លោកអគ្គនាយករបស់ RIAC រូបនេះ បានកត់សម្គាល់ថា៖ «សូមជឿចុះថា ភាពតានតឹងកើនឡើងដែលអាចកើតមាននេះ ពាក់ព័ន្ធនឹងគ្រឿងយុទ្ធោបករណ៍ធម្មតា និងមិនមែនអាវុធនុយក្លេអ៊ែរនោះឡើយ។ ទន្ទឹមនឹងនោះ អង្គការណាតូកំពុងចំណាយដល់ទៅ ១០ដងច្រើនជាងរុស្ស៊ី ប្រសិនបើមិនមានលើសពីនេះទេ លើវិស័យការពារជាតិ។ ប្រាកដណាស់ វាគឺជាសេណារីយោដ៏គ្រោះថ្នាក់មួយ»។

អ្នកជំនាញរូបនេះជឿថា លោកខាងលិចដឹងយ៉ាងច្បាស់លាស់ពីគ្រោះថ្នាក់នេះ។ លោក Timofeev បានសង្កត់ធ្ងន់ថា៖ «ថ្នាក់ដឹកនាំណាតូបានធ្វើសេចក្តីថ្លែងការណ៍ថា គ្មានកងទ័ពណាម្នាក់នឹងត្រូវបានបញ្ជូនទៅអ៊ុយក្រែននោះទេ ហើយអ្នកនយោបាយសហភាពអឺរ៉ុបមួយចំនួន បាននិយាយថា នេះគឺជារឿងឥតប្រយោជន៍។ នោះមានន័យថា ពួកគេមិនមានភាពស្របគ្នាលើបញ្ហានេះទេ»៕