ភ្នំពេញ ៖ ពេលនេះក្រុមការងារបច្ចេកទេសនាយកដ្ឋានផ្លូវដែក នៃក្រសួងសាធារណការ និងដឹកជញ្ជូន និងក្រុមហ៊ុន Royal Railway Cambodia(RRC) ព្រមទាំងក្រុមជាងជំនាញពីបរទេស បានចុះពិនិត្យរួមគ្នា និងធ្វើការងារលើការកែតម្រូវកង់រថភ្លើងដឹកអ្នកដំណើរពីទទឹងផ្លូវដែក ១០៦៧ ម.ម ដែលជាងស្តង់ដាផ្លូវដែកជប៉ុន មកទទឹងផ្លូវដែក ១០០០ ម.ម ដែលជាស្តង់ដាផ្លូវដែកកម្ពុជាវិញ និងប្រព័ន្ធហ្វ្រ័ងរថភ្លើងសម្រាប់ប្រើប្រាស់ ដើម្បីធានាសុវត្ថិភាព ប្រសិទ្ធភាព និងនិរន្តរភាព។ នេះបើតាមឯកឧត្ដម ផន រីម អនុរដ្ឋលេ ខាធិការ និងជាអ្នកនាំពាក្យក្រសួងសាធារណការ និងដឹកជញ្ជូន បានផ្សព្វផ្សាយឱ្យដឹង។

ឯកឧត្ដមបន្តថា ក្រុមការងារបច្ចេកទេសក្រសួងសាធារណការ និងដឹកជញ្ជូន បានណែនាំក្រុមហ៊ុន(RRC)ថា បន្ទាប់ពីកែតម្រូវរួច ត្រូវសាកល្បងរត់នៅលើផ្លូវដែក រហូតដល់ប្រាកថាមានសុវត្ថិភាពស ម្រាប់ដឹកជញ្ជូនអ្នកដំណើរ ទើបអាចដាក់ឱ្យដំណើរការដឹកអ្នកដំណើរជាផ្លូវការបាន។

ឯកឧត្ដមបន្ថែមថា វឌ្ឍនភាពនៃការកែសម្រួលបច្ចេកទេសរថភ្លើងនេះ កំពុងបន្ត និងសម្រេចលទ្ធផលបានច្រើនហើយ។ ចំពោះការសម្រេចដាក់ឱ្យដំណើរការនៅពេលណានោះ ក្រុមហ៊ុន RRC នឹងប្រកា សជាសាធារណៈ នាពេលឆាប់ៗខាងមុខនេះ។

ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន ក៏បានផ្តល់អនុសាសន៍ឱ្យក្រុមហ៊ុន Royal Railway Cambodia(RRC) យកចិត្តទុកដាក់ខ្ពស់លើការធានាសុវត្ថិភាព និងផាសុកភាពរបស់បងប្អូនអ្នកដំណើរ ។ ឯកឧត្តមរដ្ឋមន្ត្រីបានសង្កត់ធ្ងន់លើការលើកកម្ពស់សុវត្ថិភាព នៃដំណើរការប្រតិបត្តិការប្រចាំថ្ងៃរបស់ក្រុមហ៊ុន រាប់ទាំងការផ្សព្វផ្សាយបញ្ជ្រាបការយល់ដឹងដល់សាធារណជន ការបណ្តុះបណ្តាលអ្នកបើកបរ ការបំពាក់ផ្លាកសញ្ញា និងរបារសុវត្ថិភាព ជាពិសេសនៅត្រង់ចំណុចប្រ សព្វជាមួយផ្លូវថ្នល់ និងតំបន់ទីប្រជុំជនដែលមានចរាចរណ៍មមាញឹក ដើម្បីទប់ស្កាត់គ្រោះថ្នាក់ដែលអាចកើតមានជាយថាហេតុឱ្យអស់ពីលទ្ធភាព និងសមត្ថភាពដែលអាចធ្វើបាន។ ភាគីក្រុមហ៊ុន RRC បានទទួលយកអនុសាសន៍ និងការណែនាំចង្អុលបង្ហាញរបស់ឯកឧត្តមរដ្ឋមន្ត្រី និងប្ដេជ្ញាប្រឹងប្រែងធ្វើឱ្យប្រសើរឡើងនៃស្ថានភាពការធ្វើចរាចរណ៍លើផ្លូវដែក។

ចំពោះល្បឿនរថភ្លើងដែលយកមកពីជប៉ុន ដែលគ្រោងដាក់ឱ្យដំណើរការនៅកម្ពុជានាពេលឆាប់ៗ ខា ងមុខនេះ ក្រុមការងារជំនាញបែងចែកជា ២ ប្រភេទ ក្នុងនោះប្រភេទទី១(ភ្នំពេញ-ព្រះសីហនុ) តម្រូវ ឱ្យបើកបរក្នុងល្បឿន ៨០ គីឡូម៉ែត្រក្នុងមួយម៉ោង។ ប្រភេទទី២(ភ្នំពេញ-ប៉ោយប៉ែត)តម្រូវឱ្យបើកបរ ក្នុងល្បឿនចន្លោះពី ៣០ ទៅ ៥០ គីឡូម៉ែត្រក្នុងមួយម៉ោង៕

​ដោយ៖ គង់ ឌិន