នៅថ្ងៃសុក្រនេះ ប្រជាពលរដ្ឋរស់នៅក្នុងជំរំ Vivekanand ស្ថិតនៅកណ្តាលរដ្ឋធានីញូវ ដែល្លី បានឈររង់ចាំតាមដងផ្លូវ ដោយមានធុងទឹកនៅជាមួយ ក្រោមកម្តៅព្រះអាទិត្យដ៏ក្តៅខ្លាំង ។

ពលរដ្ឋរស់នៅតាមតំបន់ជាច្រើនក្នុងរដ្ឋធានីប្រទេសឥណ្ឌាមួយនេះ ប្រឈមនឹងកង្វះខាតទឹកធ្ងន់ធ្ងរ ដែលរដ្ឋាភិបាល ដាក់ការស្តីបន្ទោសលើនីវ៉ូទឹកទាបក្នុងទន្លេ Yamuna ដែលជាប្រភពទឹកដ៏សំខាន់របស់រដ្ឋធានីដែល្លី ។

ភាពវឹកវរបានកើតឡើងភ្លាមៗ ពេលរថយន្តដឹកសឺទែនទឹកមកដល់ ក្នុងនោះក្មេងៗនាំគ្នាឡើងលើសឺទែនទឹក ហើយមនុស្សធំ ប្រជ្រៀតគ្នាដណ្តើមទឹកពីសឺទែន ។

អ្នកស្រី Munni Devi គឺជាអ្នកស្រុកមួយរូបដែលវិលត្រឡប់មកវិញពុំបានទទួលទឹក និយាយថា រថយន្តពុំបានដឹកទឹកពេញសឺទែននោះទេ ។ មានមនុស្សច្រើនណាស់ ដណ្តើមគ្នាដងទឹក ។

សូមបញ្ជាក់ថា វិបត្តិទឹកនៅឥណ្ឌា ជាពិសេសអំឡុងរដូវក្តៅ បានប៉ះពាល់ខ្លាំងដល់ពលរដ្ឋរស់នៅតាមតំបន់ក្រីក្រ ៕