ភ្នំពេញ៖ ក្នុងការងារប្រយុទ្ធប្រឆាំងការឆ្លងរាលដាល នៃជំងឺកូវីដ-១៩ របស់រាជរដ្ឋាភិបាលកម្ពុជា នៅបន្តមានការគាំទ្រ និងចូលរួម​ពី​វិស័​យ​នា​នាជាច្រើន មានប្រទេសដៃគូ អង្គការដៃគូ និងវិស័យឯកជន តាមរយៈការផ្ដល់នូវគ្រឿងបរិក្ខាសុខាភិបាល គ្រឿងឧបភោគ​ប​រិ​ភោគ រួមទាំងសកម្មភាពចុះផ្សព្វផ្សាយ ពីគុណវិបត្តិ និងារអនុវត្តវិធានការផ្សេងៗ ពាក់ព័ន្ធនឹងជំងឺកូវីដ១៩។  

ជាក់ស្ដែងនៅថ្ងៃទី៩ ខែសីហា ឆ្នាំ២០២១ ក្រុមគ្រូពេទ្យស្ម័គ្រចិត្តសម្តេចពិជ័យសេនា ទៀ បាញ់ បានចុះអនុស្សរណៈយោគយល់គ្នា (M​O​​U) ជាមួយក្រុមហ៊ុនឆាយវ៉ាង Sakkin Water លើការលើកកម្ពស់ការអនុវត្តចក្ខុវិស័យ និងផែនការយុទ្ធសាស្ត្រ ស្តីពី​ការ​លើក​កម្ពស់​ពីសុវត្ថិភាពសុខភាព សុខុមាលភាពនៅកម្ពុជា រួមទាំងការទប់ស្កាត់ការឆ្លងរាលដាលនៃជំងឺកូវីដ១៩។

ក្នុងពិធីចុះ MOU ឯកឧត្តម ស ថាវី តំណាងក្រុមគ្រូពេទ្យស្ម័គ្រចិត្ត មានប្រសាសន៍ថា រាជរដ្ឋាភិបាលបានខិតខំយ៉ាងខ្លាំងក្លា ឲ្យពល​រដ្ឋ​បាន​​ចាក់វ៉ាក់សាំងបានគ្រប់គ្នា ដើម្បីបង្កើតភាពស៊ាំនៅក្នុងសហគមន៍ មិនឲ្យអ្នកដែលឆ្លងជំងឺនេះហើយ មានសភាពធ្ងន់ធ្ងរ។

ឯកឧត្តមបន្តថា ទោះមិនអាចកម្ចាត់ចោលជំងឺនេះទាំងស្រុង ប៉ុន្តែយើងអាចការពារជំងឺនេះបាន ដោយតម្រូវឲ្យផ្លាស់ប្តូរទម្លាប់រស់នៅ​ជា​មួយ​នឹងវីរុសកូវីដ១៩ តាមគន្លងប្រក្រតីភាពថ្មីឲ្យបានត្រឹមត្រូវ ដូច្ចេះគោលបំណងការចុះអនុស្សរណៈជាមួយ ក្រុមហ៊ុន ឆាយ វ៉ាង Sakkin Water គឺផ្ដោតលើការពង្រឹង និងអភិវឌ្ឍចំនេះដឹងសុវត្ថិភាពសុខភាព និងសុខុមាលភាពជាសាធារណៈ។

ឯកឧត្តម ស ថាវី បញ្ជាក់ថា ចំពោះផលប្រយោជន៍ នៃកិច្ចព្រមព្រៀងនេះនឹងពង្រីកកិច្ចសហប្រតិបត្តិការ ដើម្បីជួយគ្នាទៅវិញទៅមក លើវិស័យអនាម័យ និងសុខភាពតាមបែបទំនើបកម្ម យើងជ្រើសរើស Sakkin Water ជាដៃគូរដោយសារក្រុមហ៊ុននេះ ជាអ្នកឯកទេស និងឈានមុខគេលើផលិតផលទឹកសម្លាប់មេរោគ ប្រើប្រាស់បច្ចេកវិទ្យាចុងក្រោយ របស់ជប៉ុន និងមានឧបករណ៍​សម្លាប់មេ​រោគ​ជា​ច្រើ​ន​ប្រភេទ ស្របតាមតម្រូវការជួយគាំទ្រសកម្មភាពមនុស្សធម៌ផ្សេងៗ របស់ក្រុមគ្រូពេទ្យស្ម័គ្រចិត្តក្នុងការការពារខ្លួន ដើម្បីចូលរួម​ជា​​មួយ​រាជរដ្ឋាភិបាលក្នុងការប្រយុទ្ធប្រឆាំងទប់ស្កាត់ការរីករាលដាលជំងឺកូវីដ១៩ នៅកម្ពុជា ជាពិសេសកិច្ចសហប្រតិបត្តិការនេះ នឹ​ង​ជួយគាំទ្រសម្រាប់សកម្មភាពមនុស្សធម៌ ក្នុងយុទ្ធនាការជាតិចាក់វ៉ាក់សាំងជូនដល់ប្រជាពលរដ្ឋនៅរាជធានី និងតាមបណ្តាខេត្ត។

ក្នុង​ឱកាសនោះ លោក ឧកញ៉ា តាំង គួង លើកឡើងថា ការបានធ្វើការជាដៃគូជាមួយក្រុមគ្រូពេទ្យស្ម័គ្រចិត្តសម្តេចពីជ័យសេនា ទៀ បាញ់ នឹងអាចចូលរួមពង្រឹង និងអភិវឌ្ឍផ្នែកអនាម័យ ផាសុកភាព នៃការរស់នៅរបស់ពលរដ្ឋកម្ពុជា ឲ្យកាន់តែល្អប្រសើរ​ក្នុងគន្លង​ប្រ​ក្រ​តី​ភាព​ថ្មី។

លោកឧកញ៉ាបន្ថែមថា ក្រុមហ៊ុនមានគោលបំណងតែមួយ គឺចង់ឲ្យក្រុមគ្រូពេទ្យស្ម័គ្រចិត្ត បានប្រើប្រាស់ទឹកសម្លាប់មេរោគ ដែលមាន​គុណ​ភាពល្អ សម្រាប់យុទ្ធនាការចុះចាក់វ៉ាក់សាំងជូនពលរដ្ឋតាមរាជធានី និងខេត្ត ដោយទឹកសម្លាប់មេរោគ សាកគីន មានលក្ខណៈ​ពិសេ​ស​គ្រប់គ្រាន់ក្នុងកម្រិត PH ត្រឹមត្រូវ អាចប្រើប្រាស់បាញ់សម្លាប់មេរោគបានលើរាងកាយផ្តល់ភាពងាយស្រួលក្នុងការប្រើប្រាស់ និងពង្រឹងសុខសុវត្ថិភាព ជូនដល់ក្រុមគ្រូពេទ្យ និងពលរដ្ឋ ហើយក្រុមហ៊ុននឹងខិតខំសហការ និងពង្រីកកិច្ចសហប្រតិបត្តិការនេះ ឲ្យ​ដំណើរ​ការរលូន និងទទួលបានលទ្ធផលល្អប្រសើរ‌‍។

តាមរយៈកិច្ចព្រមព្រៀងនេះ ក្រុមគ្រូពេទ្យស្ម័គ្រចិត្តសម្តេចពិជ័យសេនា ទៀ បាញ់ នឹងជួយផ្សារភ្ជាប់ទំនាក់ទំនងរវាងក្រុមហ៊ុន ឆាយ​វ៉ា​ង Sakkin Water ទៅកាន់ស្ថាប័នរដ្ឋ និងឯកជន ដើម្បីធ្វើសហប្រតិបត្តិការក្នុងការផ្សព្វផ្សាយចំណេះដឹងពីការការពារសុខភាព អនាម័​យ​ សុខមាលភាពតាមបែបទំនើបកម្មឲ្យបានទូលំទូលាយ៕ អត្ថបទ៖ បាន សុខរិទ្ធិ​