​មួយថ្ងៃបន្ទាប់ពីគណៈវិនិច្ឆ័យ ទីក្រុងញូវយ៉ក បានរកឃើញថាលោកTrump មានកំហុសចំនួន៣៤ករណី ពាក់ព័ន្ធនឹងការក្លែងបន្លំឯកសារដើម្បីបិទបាំងការបង់ប្រាក់ទៅឱ្យតារាភាពយន្តអាសអាភាស ម្នាក់ បេក្ខជនប្រធានាធិបតីគណបក្សសាធារណរដ្ឋរូបនេះ បានបញ្ចេញនូវបញ្ជីគូប្រឆាំង និងបង្ហាញភាពសោកស្ដាយដោយកំហឹង។

លោកបានហៅចៅក្រម លោក Juan Merchan ដែលជាប្រធានក្នុងការជម្រះក្តីរបស់លោកថាជា «មនុស្សទុច្ចរិត»។ 

លោកបានចាត់ទុកលោក Joe Biden មកពីគណបក្សប្រជាធិបតេយ្យ ដែលជាគូប្រជែងរបស់លោក នៅក្នុងការបោះឆ្នោតនៅថ្ងៃទី៥ ខែវិច្ឆិកាថា ជា «ប្រធានាធិបតីដ៏អាក្រក់បំផុតនៅក្នុងប្រវត្តិសាស្ត្រ របស់ប្រទេសនេះ» ។ 

លោកក៏បានរិះគន់ខ្លាំងៗសាក្សី ដែលបានផ្តល់សក្ខីកម្មប្រឆាំងលោក ជាសមាជិកសភាដែលបានបោះឆ្នោតចោទប្រកាន់លោក និងបានអះអាងដដែលៗនូវវោហាសាស្ត្រការប្រមូលផ្តុំរបស់លោកចំពោះបញ្ហាជនអន្តោប្រវេសន៍ ដែលលោកបាននិយាយថាកំពុងហូរចូលមកប្រក្នុងទេស ដោយខុសច្បាប់។

តាមរយៈការអំពាវនាវរៃអង្គាសប្រាក់ និងនៅលើប្រព័ន្ធផ្សព្វផ្សាយសង្គម សម្ព័ន្ធមិត្តរបស់អតីតប្រធានាធិបតីរូបនេះ ក៏បានរិះគន់ប្រព័ន្ធយុត្តិធម៌ និងអ្នកដែលហ៊ានបង្ហាញថា លោក Trump បានប្រព្រឹត្តបទព្រហ្មទណ្ឌ។ 

ក្រុមអ្នកគាំទ្រលោក Trump ភាគច្រើន បានចាត់ទុកសាលក្រមនៅទីក្រុងញូវយ៉កថា ជាការបរាជ័យនៃយុត្តិធម៌ ដែលបានបន្លិចយុទ្ធនាការរៃអង្គាសប្រាក់របស់លោក ដោយមានការបរិច្ចាគចំនួន៣៤,៨ លានដុល្លារ កាលពីថ្ងៃព្រហស្បតិ៍ តែមួយថ្ងៃ។