ប្រធានាធិបតីសហរដ្ឋអាមេរិកលោក Joe Biden កាលពីថ្ងៃសុក្រ បានដាក់ចេញនូវអ្វីដែលលោកបាននិយាយថាជាសំណើរបស់អ៊ីស្រាអែលបីដំណាក់កាល សម្រាប់បទឈប់បាញ់នៅតំបន់ហ្កាហ្សា ជាថ្នូរទៅនឹងការដោះលែងចំណាប់ថ្នូរអ៊ីស្រាអែល ដោយបានគូសបញ្ជាក់ថា «វាដល់ពេលហើយសម្រាប់សង្រ្គាមនេះត្រូវបញ្ចប់» និងទទួលបានប្រតិកម្មដំបូងជាវិជ្ជមាន ពីសំណាក់ក្រុមហាម៉ាស។

ដំណាក់កាលទីមួយ ពាក់ព័ន្ធនឹងបទឈប់បាញ់រយៈពេលប្រាំមួយសប្តាហ៍ នៅពេលដែលកងកម្លាំងអ៊ីស្រាអែលនឹងដកខ្លួនចេញពីតំបន់ដែលមានប្រជាជនរស់នៅទាំងអស់នៅតំបន់ហ្កាហ្សា ហើយចំណាប់ខ្មាំងមួយចំនួន រួមទាំងមនុស្សចាស់ និងស្ត្រី នឹងត្រូវបានដោះលែងជាថ្នូរទៅនឹងអ្នកទោសប៉ាឡេស្ទីនរាប់រយនាក់ ហើយជនស៊ីវិលប៉ាឡេស្ទីន អាចវិលត្រឡប់ទៅលំនៅឋានរបស់ពួកគេវិញនៅតំបន់ហ្កាហ្សា ហើយរថយន្តដឹកទំនិញ៦០០គ្រឿងក្នុងមួយថ្ងៃ នឹងនាំយកជំនួយមនុស្សធម៌ចូលទៅក្នុងតំបន់ហ៊ុមព័ទ្ធដែលត្រូវបានបំផ្លិចបំផ្លាញមួយនេះ។ ក្នុងដំណាក់កាលនេះ ក្រុមហាម៉ាស និងអ៊ីស្រាអែល នឹងចរចារបទឈប់បាញ់ជាអចិន្ត្រៃយ៍ ដែលលោក Biden បាននិយាយថា នឹងមានរយៈពេល «ដរាបណាក្រុមហាម៉ាសនៅបន្តតាមការសន្យារបស់ខ្លួន»។ ក្នុងដំណាក់កាលទីពីរ លោក Biden បាននិយាយថា នឹងមានការដោះដូរសម្រាប់ចំណាប់ថ្នូរ ដែលនៅសេសសល់ទាំងអស់ រួមទាំងទាហានប្រុស ហើយកងកម្លាំងអ៊ីស្រាអែលនឹងដកខ្លួនចេញពីតំបន់ហ្កាហ្សា ហើយបទឈប់បាញ់ជាអចិន្ត្រៃយ៍នឹងចាប់ផ្តើម។ ដំណាក់កាលទីបី នឹងរួមបញ្ចូលទាំងផែនការកសាងឡើងវិញដ៏សំខាន់មួយសម្រាប់តំបន់ហ្កាហ្សា និងការវិលត្រឡប់របស់ចំណាប់ថ្នូរ ចុងក្រោយទៅដល់គ្រួសាររបស់ពួកគេ។

ក្រុមហាម៉ាស ដែលលោក Biden បាននិយាយថា បានទទួលសំណើពីប្រទេសកាតានោះ បានចេញសេចក្តីថ្លែងការណ៍មួយ ដែលមានប្រតិកម្មជាវិជ្ជមាន។ ក្រុមហាម៉ាស បាននិយាយថា ខ្លួនត្រៀមជាស្រេចដើម្បីចូលរួម «ជាលក្ខណៈវិជ្ជមាន និងបែបស្ថាបនា» ជាមួយនឹងសំណើ ដោយផ្អែកលើបទឈប់បាញ់អចិន្ត្រៃយ៍ ការដកកងកម្លាំងអ៊ីស្រាអែល ការកសាងឡើងវិញតំបន់ហ្កាហ្សា ការវិលត្រឡប់របស់ប្រជាជនភៀសខ្លួន ព្រមទាំងកិច្ចព្រមព្រៀងដោះដូរអ្នកទោសពិតប្រាកដ ប្រសិនបើអ៊ីស្រាអែល ប្រកាសយ៉ាងច្បាស់ពីការប្តេជ្ញាចិត្តចំពោះកិច្ចព្រមព្រៀងបែបនេះ។