​បាល់ទាត់៖ សមាគម​កីឡាបាល់ទាត់​កងយោធពល​ខេមរភូមិន្ទ ឬ​ក្រុម Tiffy Army បានធ្វើការ​ផ្លាស់ប្ដូរ​កីឡាករ​បរទេស ២​នាក់ដើម្បី​បង្កើន​ការប្រកួតប្រជែង​កាន់​ខ្លាំងនៅ​ជុំ​ទី​២ នៃ​លី​គ​កំពូល​កម្ពុជា។ នេះ​បើតាម​ការបញ្ជាក់​របស់​អគ្គលេខាធិការ​ក្លិប​លោក ខូវ ឆាយ។​

​អគ្គលេខាធិការ​ក្រុម​កំពុង​ឈរ​លេខ​រៀង​ទី​៧ នេះបាន​បញ្ជាក់ថា ក្លិប​បាន​ចុះកិច្ចសន្យា​ជាមួយ​កីឡាករ​បរទេស ២​រូប​រួចហើយដើម្បី​ត្រៀម​ជុំ​ទី​២ ទី​១-​កីឡាករ​នី​ហ្សេ​រី​យ៉ា Timothy Okereke ដែល​ត្រូវ​ជំនួស​កៅអី​កីឡាករ​ប្រេ​ស៊ី​ល Cristiano Santos ហើយ​ម្នាក់ទៀតកំពុង​ធ្វើ​ច​ត្ដា​ឡី​ស័កដែល​ក្លិប​គ្រោង​ប្រកាស​នាពេល​ឆាប់ៗ​ខាងមុខ។ ​​ពាក់ព័ន្ធ​ការនាំយក​កីឡាករ​មាឌធំ Timothy វិញ លោក ខូវ ឆាយ បានបង្ហាញ​សុទិដ្ឋិនិយម​ខ្ពស់លើ​អតីត​ខ្សែប្រយុទ្ធ​ក្លិប​អង្គ​រថា​យ​ហ្គឺ​រ និង​ភ្នំពេញ​ក្រោ​ន​រូបនេះដោយ​រំពឹងថា រូបគេ​នឹង​រួមចំណែក​ជួយ​ក្រុម​បាន​ច្រើន​នៅ​ជុំ​ទី​២ ពិសេស​តំបន់​ប្រយុទ្ធតាមរយៈ​គុណភាព បច្ចេកទេស និង​មាឌធំ​របស់គេ។​

​​គួរ​បញ្ជាក់ថា បច្ចុប្បន្ន​ក្រុម Tiffy Army មាន​កីឡាករ​បរទេស ៤​រូប​ក្នុង​ដៃបន្ទាប់ពី​បញ្ចប់​កិច្ចសន្យា​កីឡាករ Cristiano Santos មុន​ការកំណត់ ក្នុងនោះ​មាន​កីឡាករ​ជប៉ុន Yuta Kikuchi និង Rio Sakuma, កីឡាករ​ប្រេ​ស៊ី​ល Romario និង​កីឡា​ករនី​ហ្សេ​រី​យ៉ា Dzarma Bata។ ក្នុងចំណោម​កីឡាករ​បរទេស ៤​រូបនេះនឹងមាន​ម្នាក់​ត្រូវ​ចាកចេញ​នៅ​ជុំ​ទី​២។ នេះ​បើតាម​ការបញ្ជាក់​របស់​លោក ខូវ ឆាយ៕

​អត្ថបទ៖ លី ឈុន​ឡា