​ចំបាប់៖ ឯកឧត្ដម អ៊ុក សិទ្ធិ​ជាតិ អគ្គនាយកនៃ​អគ្គនាយកដ្ឋាន​កីឡា និង​ជា​អគ្គលេខាធិការ​រង​គណៈ​កម្ម​ការ​ជាតិ​រៀបចំ​ការប្រកួត​កីឡា​អាស៊ីអាគ្នេយ៍លើក​ទី​៣២ ឆ្នាំ​២០២៣ (CAMSOC) បានអនុញ្ញាត​ឲ្យ​លោក Caesy Barnett អនុប្រធាន​សហព័ន្ធ​កីឡា​ចំបាប់​កម្ពុជាជួប​សម្តែង​ការគួរសម និង​បង្ហាញ​នូវ​វត្តមាន​គ្រូ​ជម្រើសជាតិ​ចំបាប់​កម្ពុ​ជាថ្មីគឺ​លោក Komeil Ghasemi ដែលជា​គ្រូបង្វឹក​ជនជាតិ​អ៊ីរ៉ង់ និង​ជា​អតីត​ម្ចាស់​មេដាយមាស​កីឡា​អូឡាំពិក។​

​ជំនួប​សំណេះសំណាល​នេះបានធ្វើ​ឡើង​នៅ​ភោជនីយដ្ឋាន​មួយកន្លែង កាលពី​ថ្ងៃទី​០៩ ខែសីហា ឆ្នាំ​២០២១ សហព័ន្ធ​កីឡា​ចំបាប់​កម្ពុជាបានប្រកាស​លោក Komeil Ghasemi ជា​គ្រូបង្វឹក​ជម្រើសជាតិ​ចំបាប់​កម្ពុជាក្រោម​កិច្ចសន្យា​រយៈពេល ១​ឆ្នាំតាមរយៈ​គម្រោង​អភិវឌ្ឍ​កីឡា​របស់​គណៈ​កម្ម​ការ​ជាតិ CAMSOC បន្ទាប់ពី​ទទួលបាន​ការអនុញ្ញាត​ជាគោលការណ៍​ពី​សំណាក់​សម្ដេច​ពិជ័យ​សេនា ទៀ បាញ់ ឧបនាយករដ្ឋមន្ដ្រី រដ្ឋមន្ដ្រី​ក្រសួងការពារជាតិ និង​ជា​ប្រធាន CAMSOC កាលពី​ថ្មីៗ។​ ​ក្នុងនាម​អគ្គនាយកនៃ​អគ្គនាយកដ្ឋាន​កីឡា ក្រសួង​អប់រំ​យុវជន និង​កីឡា និង​ក្នុងនាម​អគ្គលេខាធិការរង​គណៈ​កម្ម​ការ​ជាតិ CAMSOC ឯកឧត្តម អ៊ុក សិទ្ធ​ជាតិ បាន​ថ្លែងអំណរគុណ​ដល់​លោកគ្រូ​បង្វឹក Komeil Ghasemi ដែល​បានមក​ដឹកនាំ​បង្វឹក​ដល់​ក្រុមកីឡា​ចំបាប់​ជម្រើសជាតិ​កម្ពុជា ដើម្បី​សម្រួច​បច្ចេកទេស និង​ត្រៀមខ្លួន​ចូលរួម​ព្រឹត្តិការ​កីឡា​ស៊ី​ហ្គេម​លើក​ទី​៣១ នៅ​វៀតណាមនា​ឆ្នាំ​២០២២ ពិសេស​ត្រៀម​ឆ្ពោះទៅ​ស៊ី​ហ្គេម ឆ្នាំ​២០២៣ ដែល​កម្ពុជា​នឹងធ្វើ​ជា​ម្ចាស់ផ្ទះ​ជា​ប្រវត្តិសាស្ដ្រ​លើកដំបូង។​

​គួរ​ដឹងថា មុន​វិវត្តន៍​ខ្លួន​ជា​គ្រូបង្វឹក​លោក Komeil Ghasemi គឺជា​អតីត​កីឡាករ​ឆ្នើម​អ៊ីរ៉ង់ដោយ​ធ្លាប់​ឈ្នះ​មេដាយមាស​អូឡាំពិកទីក្រុង​ឡុងឆ្នាំ​២០១២ លើ​ប្រភេទ​ទម្ងន់ ១២០​គីឡូក្រាម និង​ឈ្នះ​មេដាយប្រាក់​អូឡាំពិកទីក្រុង​រី​យ៉ូឆ្នាំ​២០១៦ លើ​ប្រភេទ​ទម្ងន់ ១២៥​គីឡូក្រាម។ លើសពីនេះ លោក​ក៏​ធ្លាប់​ឈ្នះ​មេដាយប្រាក់​ពិភពលោកកាលពី​ឆ្នាំ​២០១៤ និង​ឈ្នះ​មេដាយមាស​ជើង​ឯក​ទ្វីបអាស៊ីឆ្នាំ​២០១៤ រួមទាំង​ឈ្នះ​មេដាយប្រាក់​ជើងឯក​ទ្វីបអាស៊ី ២​សម័យកាលពី​ឆ្នាំ​២០​១​១ និង​ឆ្នាំ​២០១៥ ទៀតផង៕

​អត្ថបទ៖ លី ឈុន​ឡា​