​

ភ្នំពេញ៖ ឯកឧត្តម គី តិច ទេសរដ្ឋមន្ដ្រីទទួលបន្ទុកបេសកកម្មពិសេស និង ជាប្រធានមេធាវីរាជរដ្ឋាភិបាល នៅព្រឹកថ្ងៃទី០២ ខែមិថុនា ឆ្នាំ២០២៤នេះ បានបន្ដជួបជាមួយជនរងគ្រោះចំនួន២៦៧នាក់ ក្នុងសំណុំរឿងក្រុមហ៊ុនរបស់អតីតឧកញ៉ា ឡេង ចាន់ណា ដែលជាក្រុមជាទី២។

ឯកឧត្តម គី តិច បានអះអាងថា ក្រោយទទួលបានការប្រគល់សិទ្ធិពីសម្ដេចធិបតី ហ៊ុន ម៉ាណែតនាយករដ្ឋមន្ត្រី នៃព្រះរាជាណាចក្រកម្ពុជា ក្រុមមេធាវីរាជរដ្ឋាភិបាល បានចាត់ចែងក្រុមការងារបន្ទាន់ភ្លាមៗ ដើម្បីផ្ដល់មធ្យោបាយជូនប្រជាពលរដ្ឋដែលជាជនរងគ្រោះ។

ឯកឧត្តម បានបញ្ជាក់ទៀតថា ការជួបជាមួយប្រជាពលរដ្ឋលើកទីពីរ ដែលមានពលរដ្ឋរងគ្រោះចំនួន ២៦៧នាក់នៅពេលនេះ គឺជាជំហានដំបូងតែប៉ុណ្ណោះ ដើម្បីក្រុមមេធាវីរាជរដ្ឋាភិបាលអាចទទួលបានព័ត៌មានបន្ថែមពាក់ពន្ធ័នឹងសំណុំរឿងជាពិសេស គឺតម្រូវអោយពលរដ្ឋរងគ្រោះ ស្មគ្រ័ចិត្ត ផ្តិតមេដៃដើម្បីប្រគល់សិទ្ធិជូនមេធាវីរាជរដ្ឋាភិបាល បន្តការងារតាមនីតិវិធីច្បាប់។ 

ឯកឧត្តម បានលើកឡើងថា ប្រមុខរាជរដ្ឋាភិបាល សម្តេច ធិបតី ហ៊ុន ម៉ាណែត តែងតែយកចិត្តទុកដាក់លើសំណុំរឿងនេះជាខ្លាំង តាមរយៈចាប់ខ្លួនជនពាក់ព័ន្ធ និងបញ្ចប់មុខងារឧកញ៉ា រួមនឹងស្វះស្វែងគ្រប់ផ្នែកទាំងអស់ ដើម្បីជួយជនរងគ្រោះ។ រាជរដ្ឋាភិបាលបានចាត់បញ្ជាក្រុមការងារជំនាញមួយក្រុមទៀត ដើម្បីស្រាវជ្រាវរកទ្រព្យសម្បត្តិរបស់បក្ខពួកអតីតឧកញ៉ា ឡេង ចាន់ណា ដែលបានពីការឆបោកប្រជាពលរដ្ឋនាពេលកន្លងទៅនេះ។

ឯកឧត្តមមេធាវី គី តិច បានសង្កត់ធ្ងន់ថា ការប្រគល់សិទ្ធិដោយស្របច្បាប់នៅពេលនេះ គឺជាការជួយសម្រួលទាំងស្រុងជូនដល់ពលរដ្ឋរងគ្រោះ ដោយមិនតម្រូវអោយពលរដ្ឋបង់ថ្លៃសេវាមេធាវីនោះទេ។ នេះជាលើកទី១ហើយ ដែលរាជរដ្ឋាភិបាលបញ្ជូនមេធាវីររដ្ឋាភិបាល ជួយការពារប្រជាពលរដ្ឋក្នុងសំណុំរឿងឯកជន។

សូមរំលឹកថា កាលពីថ្ងៃទី២៩ ខែឧសភា ឆ្នាំ២០២៤កន្លងទៅនេះ ក្រុមមេធាវីរាជរដ្ឋាភិបាល ក៏បានជួបជាមួយជនរងគ្រោះប្រមាណជិត២៥០នាក់ម្ដងរួចមកហើយ ដែលនោះជាក្រុមទី១។ ការជួបនេះនឹងធ្វើឡើងជាបន្ដបន្ទាប់ រហូតទាល់តែគ្រប់ចំនួននៃជនរងគ្រោះ ដើម្បីទទួលយកព័ត៌មានផ្សេងៗ និងបញ្ចប់រាល់ចម្ងល់ទាំងអស់របស់ជនរងគ្រោះ។

សូមបញ្ជាក់ថា គិតមកដល់ពេលនេះ សាលាដំបូងខេត្តសៀមរាប បានអនុវត្ត កិច្ចនីតិវិធីជាច្រើន មានដូចខាងក្រោម៖

* ១៖ បានសម្រេចបង្កកគណនីធនាគារ ចំនួន ១៨៣ គណនី និងទ្រព្យសម្បត្តិមួយចំនួន។ 

* ២៖ បានសម្រេចឃុំខ្លួនជនត្រូវចោទចំនួន ៧ នាក់, បានចេញដីកាបង្គាប់ឱ្យនាំខ្លួនជនត្រូវចោទចំនួន ២ នាក់ និងបានចេញដីកាបង្គាប់ឱ្យចូលខ្លួនលើជនត្រូវចោទចំនួន ២៤ នាក់ ដោយកំណត់ឱ្យចូល ខ្លួនគិតចាប់ពីថ្ងៃទី១៨ ខែមេសា ឆ្នាំ២០២៤ ដល់ថ្ងៃទី១៧ ខែឧសភា ឆ្នាំ២០២៤។

* ៣៖ បានចេញដីកាចាត់ឱ្យស៊ើបសួរជំនួស ដោយបង្គាប់ឱ្យស្រាវជ្រាវទ្រព្យសម្បត្តិ និងសាវតារជាតិ របស់ជនពាក់ព័ន្ធផ្សេងទៀត ដើម្បីចាត់ការបន្តតាមនីតិវិធី។

សាលាដំបូងខេត្តសៀមរាប បាននិងកំពុងចាត់ការ ហើយនឹងបន្តចាត់ការសំណុំរឿងពាក់ព័ន្ធនឹង ក្រុមហ៊ុន ប្រ៊ីលាន ស៊ីធី វើលដ៍ ឯ.ក របស់ ជនត្រូវចោទឈ្មោះ ឡេង ចាន់ណា ប្រកបដោយការយកចិត្តទុកដាក់ខ្ពស់ ដោយភាពត្រឹមត្រូវ ច្បាស់លាស់ តម្លាភាព និងយុត្តិធម៌ដោយអនុវត្តតាមច្បាប់ និងនីតិវិធីជាធរមាន៕ អត្ថបទ៖ សូដាវណ្ណ