ប្រទេសចិន បានចុះចតយានដែលមិនមានអវកាសយានិក នៅលើផ្នែកឆ្ងាយនៃឋានព្រះចន្ទ នៅថ្ងៃអាទិត្យ (០២ មិថុនា) នេះ ដោយបានជម្នះឧបសគ្គសំខាន់នៅក្នុងបេសកកម្មដ៏ធំជាប្រវត្តិសាស្រ្តរបស់ខ្លួនក្នុងការទាញយកគំរូថ្ម និងដីដំបូងបង្អស់របស់ពិភពលោកពីផ្ទៃអឌ្ឍគោលព្រះចន្ទដ៏ងងឹតនេះ។

ការចុះចតនេះបានលើកកម្ពស់ឋានៈថាមពលអវកាសរបស់ប្រទេសចិន នៅក្នុងការប្រជែងជាសកលទៅកាន់ឋានព្រះចន្ទ ជាទីដែលប្រទេសនានា រួមទាំងសហរដ្ឋអាមេរិក សង្ឃឹមថានឹងទាញយករ៉ែតាមព្រះចន្ទ ដើម្បីទ្រទ្រង់បេសកកម្មរបស់អវកាសយានិករយៈពេលវែង និងបង្កើតមូលដ្ឋានព្រះចន្ទ ក្នុងប៉ុន្មានទសវត្សរ៍ក្រោយ។

យានចុះចត ឆាងអឺ-៦ (Chang'e-6) ដែលបំពាក់ដោយឧបករណ៍ពហុមុខងារ និងឧបករណ៍បាញ់បង្ហោះផ្ទាល់របស់ខ្លួន បានចុះចតក្នុងរណ្តៅនៃផ្ទៃព្រះចន្ទដ៏ធំសម្បើមមួយ ហៅថា អាង អេដខិន នៃប៉ូលខាងត្បូង (South Pole-Aitken Basin) នៅលើផ្នែកចំហៀងនៃភពព្រះចន្ទ នៅម៉ោង ៦:២៣ នាទីព្រឹក (ម៉ោងនៅទីក្រុងប៉េកាំង) នេះបើតាមរដ្ឋបាលអវកាសជាតិចិន។ ទីភ្នាក់ងារនេះបាននិយាយនៅក្នុងសេចក្តីថ្លែងការណ៍មួយនៅលើគេហទំព័ររបស់ខ្លួនថា បេសកកម្មនេះ «ពាក់ព័ន្ធនឹងការច្នៃប្រឌិតផ្នែកវិស្វកម្មជាច្រើន មានហានិភ័យខ្ពស់ និងភាពលំបាកយ៉ាងធំធេង»។

បេសកកម្មដែលទទួលបានជោគជ័យមួយនេះ គឺជាបេសកកម្មទីពីររបស់ចិន នៅផ្នែកឆ្ងាយនៃព្រះចន្ទ ជាតំបន់ដែលពុំមានប្រទេសផ្សេងបានទៅដល់។ ផ្នែកចំហៀងនៃព្រះចន្ទ ដែលតែងតែបែរមុខទៅឆ្ងាយពីផែនដីនេះ មានស្នាមរណ្ដៅជ្រៅ និងងងឹត ដែលធ្វើឱ្យទំនាក់ទំនង និងប្រតិបត្តិការចុះចតដោយយានអវកាសកាន់តែមានការប្រកួតប្រជែង។ ដោយសារបញ្ហាប្រឈមទាំងនេះ ក្រុមអ្នកជំនាញផ្នែកព្រះចន្ទ និងអវកាសដែលចូលរួមក្នុងបេសកកម្ម ឆាងអឺ-៦ បានពណ៌នាដំណាក់កាលចុះចតនេះថាជាពេលវេលាដ៏លំបាកដែលឱកាសនៃការបរាជ័យ គឺខ្ពស់បំផុត៕