ទីក្រុងសេអ៊ូល បាននិយាយនៅថ្ងៃអាទិត្យ (០២ មិថុនា) នេះថា ប្រទេសកូរ៉េខាងជើង បានបញ្ជូនបាឡុងចំនួន ៦០០ គ្រឿងដែលដឹកសំរាម ចូលទៅក្នុងប្រទេសកូរ៉េខាងត្បូង ក្នុងពេលពេញមួយយប់ នៅក្នុងសកម្មភាពចុងក្រោយបំផុតរបស់ទីក្រុងព្យុងយ៉ាង ដើម្បីរំខានប្រទេសជិតខាង ដែលជាគូប្រជែងរបស់ខ្លួន។

បាឡុងដែលដឹកសំរាមដូចជាកន្ទុយបារី ក្រណាត់ សំណល់ក្រដាស និងផ្លាស្ទិកទាំងនេះ ត្រូវបានគេរកឃើញពាសពេញរាជធានីចាប់ពីម៉ោង ៨ យប់នៅថ្ងៃសៅរ៍ ដល់ម៉ោង ១០ ព្រឹកនៅថ្ងៃអាទិត្យ (ម៉ោងក្នុងស្រុក) នេះបើតាមនាយសេនាធិការចម្រុះរបស់កូរ៉េខាងត្បូង។ ទីភ្នាក់ងារនេះបាននិយាយថា យោធាកំពុងត្រួតពិនិត្យចំណុចចាប់ផ្តើម និងធ្វើការឈ្លបយកការណ៍តាមអាកាស ដើម្បីតាមដាន និងប្រមូលបាឡុង ដែលមានថង់សំរាមធំៗដាក់នៅក្រោមនោះ។

ប្រទេសកូរ៉េខាងជើង កាលពីថ្ងៃពុធ បានបញ្ជូនបាឡុងសំរាមរាប់រយគ្រឿងឆ្លងកាត់ព្រំដែន ជាអ្វីដែលខ្លួនហៅថា «អំណោយនៃភាពស្មោះត្រង់» សម្រាប់កូរ៉េខាងត្បូង។ ទីក្រុងសេអ៊ូល បានឆ្លើយតបដោយកំហឹង ដោយបានហៅសកម្មភាពនោះថាជារឿងគ្រោះថ្នាក់។ ការប្រកាសអាសន្នត្រូវបានដាក់ចេញនៅក្នុងខេត្ត ណស ខ្យុងសាង (North Gyeongsang) និងខេត្ត កាងវ៉ុន (Gangwon) និងផ្នែកខ្លះនៃទីក្រុងសេអ៊ូលនៅថ្ងៃអាទិត្យ ដោយបានដាស់តឿនប្រជាជនកុំឱ្យប៉ះពាល់បាឡុងនោះ និងត្រូវជូនដំណឹងដល់នគរបាល។

យោងតាមយោធាកូរ៉េខាងត្បូងបានឱ្យដឹងថា រដ្ឋមន្ត្រីការពារជាតិកូរ៉េខាងត្បូង លោក ស៊ីន វ៉ុនស៊ីក (Shin Won-sik) បាននិយាយក្នុងអំឡុងកិច្ចប្រជុំជាមួយរដ្ឋមន្ត្រីការពារជាតិអាមេរិក លោក ឡយដ៍ អស្ទីន (Lloyd Austin) នៅក្រៅកិច្ចសន្ទនាសន្តិសុខ សាំងគ្រី-ឡា (Shangri-La) នៅប្រទេសសិង្ហបុរី នៅថ្ងៃអាទិត្យនេះថា បាឡុងសំរាមនោះបានរំលោភលើកិច្ចព្រមព្រៀងបញ្ចប់សង្រ្គាមរវាងភាគីទាំងពីរ៕