ប្រព័ន្ធផ្សព្វផ្សាយរដ្ឋរបស់ចិន បាននិយាយនៅថ្ងៃអាទិត្យ (០២ ឧសភា) នេះថា បុគ្គលិកនៅលើនាវាហ្វីលីពីន បានតម្រង់កាំភ្លើងទៅកាន់ឆ្មាំល្បាតឆ្នេររបស់ចិន នៅក្នុងដែនទឹកដែលមានជម្លោះនៃសមុទ្រចិនខាងត្បូងកាលពីខែមុន។ ទូរទស្សន៍ CCTV បាននិយាយនៅក្នុងសារបង្ហោះតាមប្រព័ន្ធផ្សព្វផ្សាយសង្គមថា យ៉ាងហោចណាស់មានបុគ្គលិកពីរនាក់នៅលើនាវាហ្វីលីពីន នៅជិតដែនទឹក សេខិន ថូម៉ាស ស្ហូល (Second Thomas Shoal) បានកាន់កាំភ្លើងនៅលើនាវា ដោយតម្រង់ទៅទិសឆ្មាំល្បាតឆ្នេររបស់ប្រទេសចិន។

វីដេអូមួយដែលមានរយៈពេល ២៩ វិនាទី បានបង្ហាញឱ្យឃើញបុរសពាក់ម៉ាស់ម្នាក់បានលើកវត្ថុពណ៌ខ្មៅស្រអាប់មួយ ដែលស្រដៀងទៅនឹងកាំភ្លើង។ ទូរទស្សន៍ CCTV នេះបាននិយាយថាឧប្បត្តិហេតុដែលត្រូវបានចោទប្រកាន់នេះ បានកើតឡើងក្នុងអំឡុងពេលបេសកកម្មហ្វីលីពីនដើម្បីផ្គត់ផ្គង់កងទ័ព ដែលត្រូវឈរជើងលើនាវាចម្បាំងដ៏ចំណាស់ ដែលក្រុងម៉ានីល បានចតចោលនៅឆ្នាំ១៩៩៩ ដើម្បីពង្រឹងការទាមទារអធិបតេយ្យភាពរបស់ខ្លួន។

កងទ័ពជើងទឹកហ្វីលីពីន ឆ្មាំល្បាតឆ្នេរ និងក្រុមប្រឹក្សាសន្តិសុខជាតិ ក៏ដូចជាស្ថានទូតរបស់ប្រទេសនេះនៅក្នុងទីក្រុងប៉េកាំង មិនបានឆ្លើយតបភ្លាមៗចំពោះសំណើសុំការអត្ថាធិប្បាយទេ។

ការប្រឈមមុខដាក់គ្នារវាងហ្វីលីពីន និងចិន នៅសមុទ្រចិនខាងត្បូងកាន់តែតានតឹង និងញឹកញាប់ក្នុងអំឡុងឆ្នាំកន្លងទៅ រួមទាំងឧបត្តិហេតុដែលឆ្មាំល្បាតឆ្នេររបស់ចិន ប្រើកាណុងបាញ់ទឹកលើនាវាហ្វីលីពីន និងការចោទប្រកាន់ដោយទីក្រុងម៉ានីល ថាឆ្មាំល្បាតឆ្នេរចិន បានធ្វើឱ្យខូចខាតដល់នាវារបស់ខ្លួន៕