លោក ជីង ជានហ្វឹង (Jing Jianfeng) អនុប្រធាននាយកដ្ឋានបុគ្គលិកចម្រុះនៃគណៈកម្មាធិការយោធាមជ្ឈិមនៃប្រទេសចិន បាននិយាយនៅក្នុងប្រទេសសិង្ហបុរី កាលពីថ្ងៃសៅរ៍ (០១ មិថុនា) ថា ការនិយាយបំភ្លើសរបស់សហរដ្ឋអាមេរិក អំពីបញ្ហាសមុទ្រចិនខាងត្បូង គឺឃ្លាតឆ្ងាយពីការពិតខ្លាំងណាស់ ហើយនោះគ្រាន់តែអាចបង្កើតឱ្យមានភាពភ័យស្លន់ស្លោដែលមិនចាំបាច់ប៉ុណ្ណោះ។

នៅក្នុងសន្និសិទសារព័ត៌មានដែលធ្វើឡើងក្នុងអំឡុងពេលកិច្ចសន្ទនា សាំងគ្រី-ឡា (Shangri-La) លើកទី២១ លោក ជីង បានបដិសេធការអះអាងលើសមុទ្រចិនខាងត្បូង ដែលធ្វើឡើងដោយរដ្ឋមន្ត្រីការពារជាតិអាមេរិក លោក ឡយដ៍ អស្ទីន (Lloyd Austin) នៅក្នុងសុន្ទរកថារបស់លោកកាលពីថ្ងៃសៅរ៍។

លោក ជីង និយាយថា «ស្ថានភាពបច្ចុប្បន្ននៅសមុទ្រចិនខាងត្បូងជាទូទៅមានស្ថេរភាព។ ការនិទានរឿងរបស់សហរដ្ឋអាមេរិក អំពីបញ្ហាសមុទ្រចិនខាងត្បូង បានបង្វែរចេញពីការពិត និងគ្រាន់តែអាចបង្កើតការភ័យស្លន់ស្លោដែលមិនចាំបាច់ប៉ុណ្ណោះ ហើយចេតនាព្យាបាទរបស់អាមេរិក គឺជាភស្តុតាងបញ្ជាក់ពីការបង្កហេតុ»។ លោក ជីង បន្ថែមថា «ហេតុផលនៅពីក្រោយកំណើនភាពតានតឹងក្នុងតំបន់ និងភាពមិនស្ថិតស្ថេរនៃស្ថានការណ៍នៅសមុទ្រចិនខាងត្បូង គឺចាក់ឫសគល់ចេញពីការញុះញង់របស់ហ្វីលីពីន និងការជ្រៀតជ្រែករបស់សហរដ្ឋអាមេរិក។ សុន្ទរកថាធ្វើឡើងដោយតំណាងសហរដ្ឋអាមេរិក ដែលបានគាំទ្រប្រទេសហ្វីលីពីន និងប្រមាថចំពោះសកម្មភាពការពារសិទ្ធិធម្មតារបស់ប្រទេសចិន គឺមិនសមហេតុផលទាល់តែសោះ»។

រដ្ឋមន្ត្រីការពារជាតិចិន បានព្រមានអាមេរិក យ៉ាងម៉ឺងម៉ាត់ថា សកម្មភាពមិនសមរម្យរបស់ខ្លួននៅក្នុងសមុទ្រចិនខាងត្បូងនឹងមិនត្រូវបានអត់ឱនឡើយ។ មន្ត្រីយោធាចិនជាន់ខ្ពស់ម្នាក់នៅប្រទេសសិង្ហបុរី បាននិយាយកាលពីថ្ងៃសៅរ៍ថា ស្តង់ដារពីររបស់សហរដ្ឋអាមេរិក កំពុងបង្កើតភាពចលាចលជុំវិញពិភពលោក ហើយថាទំនាក់ទំនងយោធាមានសារៈសំខាន់ណាស់សម្រាប់ការរំពឹងទុករវាងប្រទេសទាំងពីរ និងជាសកល៕