មន្ត្រីម្នាក់មកពីទីភ្នាក់ងារជំនួយ និងការងាររបស់អង្គការសហប្រជាជាតិសម្រាប់ជនភៀសខ្លួនប៉ាឡេស្ទីននៅតំបន់ដើមបូព៌ា (UNRWA) នៅតំបន់ហ្កាហ្សា បាននិយាយកាលពីថ្ងៃអាទិត្យ (០២ មិថុនា) ថា ប្រជាជននៅក្នុងតំបន់ហ៊ុមព័ទ្ធប៉ាឡេស្ទីនមួយនេះ ត្រូវការជំនួយស្បៀងអាហារយ៉ាងច្រើនដើម្បីគ្រប់គ្រាន់បញ្ចៀសគ្រោះទុរ្ភិក្ស។

លោកស្រី អ៊ីណាស ហាមដាន (Inas Hamdan) មន្ត្រីព័ត៌មានសាធារណៈស្តីទីរបស់ទីភ្នាក់ងារជំនួយប៉ាឡេស្ទីន UNRWA នៅហ្កាហ្សា បាននិយាយនៅក្នុងបទសម្ភាសន៍ផ្ទាល់នៅទីក្រុងគែរ ជាមួយបណ្តាញទូរទស្សន៍រដ្ឋ អាល់កាហេរ៉ា (Al-Qahera) របស់ប្រទេសអេហ្ស៊ីប ថា «មិនមានកន្លែងសុវត្ថិភាពនៅក្នុងតំបន់នេះទេ ហើយវិបត្តិមនុស្សធម៌កាន់តែស្មុគស្មាញ និងធ្ងន់ធ្ងរ»។

លោកស្រីបានបន្តថា មជ្ឈមណ្ឌលជម្រកនៅក្នុងទីក្រុងខាន់យូនីស (Khan Younis) ភាគខាងត្បូង និងកណ្តាលហ្កាហ្សា ពោរពេញទៅដោយជនភៀសខ្លួនប៉ាឡេស្ទីនពីទីក្រុងរ៉ាហ្វា (Rafah) ដែលជាទីក្រុងចុងខាងត្បូងនៃតំបន់នេះ ស្របពេលមានការវាយប្រហាររបស់អ៊ីស្រាអែល។ លោកស្រីបានបន្ថែមថាក្រុមការងាររបស់ទីភ្នាក់ងារ UNRWA កំពុងព្យាយាមផ្តល់សេវាសុខភាព និងចែកចាយការផ្គត់ផ្គង់ស្បៀងអាហារដល់ទីជម្រកដែលត្រូវការជំនួយអាហារក្នុងចំនួនច្រើនដើម្បីបញ្ចៀសគ្រោះទុរភិក្ស។

យ៉ាងហោចណាស់មានជនជាតិប៉ាឡេស្ទីនជាង ៣៦.៤០០ នាក់បានស្លាប់ និងជាង ៨២.៦០០ នាក់ផ្សេងទៀតបានរងរបួស នេះបើយោងតាមតួលេខដែលចេញផ្សាយដោយអាជ្ញាធរសុខាភិបាលហ្កាហ្សា ចាប់តាំងពីអ៊ីស្រាអែល បានបើកការវាយលុកទ្រង់ទ្រាយធំ បន្ទាប់ពីក្រុមហាម៉ាស បានធ្វើការវាយប្រហារដ៏គួរឱ្យភ្ញាក់ផ្អើលមួយទៅលើភាគខាងត្បូងរដ្ឋជ្វីហ្វមួយនេះមក៕