អ្នកពន្លត់អគ្គិភ័យម្នាក់ បានស្លាប់ពេលកំពុងព្យាយាមជួយសង្គ្រោះអ្នកស្រុកដែលជាប់គាំងក្នុងទឹកជំនន់ ហើយមនុស្សរាប់ម៉ឺននាក់ ត្រូវបង្ខំចិត្តចាកចេញពីលំនៅឋានរបស់ពួកគេ ខណៈដែលភ្លៀងធ្លាក់ខ្លាំងបានបង្កជាទឹកជំនន់នៅភាគខាងត្បូងប្រទេសអាល្លឺម៉ង់។

បុរសវ័យ ៤២ ឆ្នាំដែលបានស្លាប់រូបនោះ បាននៅក្នុងប្រតិបត្តិការទូកជួយសង្គ្រោះ ដែលដឹកអ្នកពន្លត់អគ្គិភ័យ ៤ នាក់ ហើយក៏បានក្រឡាប់កាលពីល្ងាចថ្ងៃសៅរ៍ បន្ទាប់មកសាកសពរបស់លោកត្រូវបានគេរកឃើញនៅព្រឹកថ្ងៃអាទិត្យ (០២ មិថុនា) ប្រហែល ៥០ គីឡូម៉ែត្រភាគខាងជើងនៃទីក្រុង មូនិច (Munich)។

តំបននានានៅជុំវិញនោះមានពេលប៉ុន្មានថ្ងៃប៉ុណ្ណោះដើម្បីត្រៀមខ្លួនសម្រាប់ទឹកជំនន់ ប៉ុន្តែមនុស្សប្រហែល ៣.០០០ នាក់ត្រូវជម្លៀសចេញរួចមកហើយនៅភាគខាងត្បូងប្រទេសអាល្លឺម៉ង់ ខណៈទឹកបានកាត់ផ្តាច់តំបន់មួយចំនួន។

អធិការបតីអាល្លឺម៉ង់ លោក អូឡា សូស (Olaf Scholz) គ្រោងនឹងធ្វើដំណើរទៅកាន់តំបន់រងគ្រោះនៅថ្ងៃចន្ទ (០៣ មិថុនា) នេះ ខណៈដែលរដ្ឋមន្ត្រីសេដ្ឋកិច្ច និងជាអនុអធិការបតី លោក រ៉ូប៊ឺត ហាប៊ែក (Robert Habeck) បានសន្យាគាំទ្រដល់តំបន់ដែលរងផលប៉ះពាល់ក្នុងអំឡុងពេលទស្សនកិច្ចកាលពីថ្ងៃអាទិត្យ ហើយបានលើកឡើងថា បម្រែបម្រួលអាកាសធាតុកំពុងបង្កឱ្យមានព្រឹត្តិការណ៍អាកាសធាតុកាន់តែធ្ងន់ធ្ងរ។

ផ្នែកខ្លះនៃទ្វីបអឺរ៉ុប ត្រូវបានវាយប្រហារដោយទឹកជំនន់ដ៏ធំក្នុងឆ្នាំ២០២១ ដែលបានសម្លាប់មនុស្សជិត ២០០ នាក់ ដោយប្រទេសអាល្លឺម៉ង់ ទទួលរងនូវការខូចខាតយ៉ាងខ្លាំង។ គ្រោះមហន្តរាយនោះត្រូវបានស្តីបន្ទោសយ៉ាងទូលំទូលាយលើផលវិបាកនៃបម្រែបម្រួលអាកាសធាតុ ហើយបានជំរុញឱ្យមានការអំពាវនាវឱ្យមានការព្រមាន និងវិធានការសុវត្ថិភាពកាន់តែតឹងរ៉ឹង៕