ប្រធានាធិបតី លោក Cyril Ramaphosa បានអំពាវនាវឱ្យគណបក្សនយោបាយរបស់ប្រទេសអាហ្រ្វិកខាងត្បូង ធ្វើការរួមគ្នាដើម្បីភាពល្អប្រសើររបស់ប្រទេស ខណៈលទ្ធផលចុងក្រោយពីការបោះឆ្នោតកាលពីសប្តាហ៍មុន បានបង្ហាញថា គណបក្ស African National Congress (ANC) របស់លោក បានបាត់បង់សំឡេងភាគច្រើន ជាលើកដំបូង។

លទ្ធផល ដែលត្រូវបានប្រកាសកាលពីថ្ងៃអាទិត្យ គឺជាការបោះឆ្នោតធ្លាក់ចុះខ្លាំងបំផុត ដែលបបានបង្ហាញសម្រាប់គណបក្ស ANC ជាចលនារំដោះមានអាយុកាលចំណាស់បំផុតរបស់ទ្វីបអាហ្រ្វិក ដែលធ្លាប់ដឹកនាំដោយ លោក Nelson Mandela។

អ្នកបោះឆ្នោត មានកំហឹងទៅនឹងភាពអត់ការងារធ្វើ វិសមភាព និងការដាច់ចរន្តអគ្គិសនី ដែលបានកាត់បន្ថយការគាំទ្រដល់គណបក្ស ANC មកនៅត្រឹមតែ ៤០,២ ភាគរយ ធ្លាក់ចុះពី ៥៧,៥ភាគរយ នៅក្នុងការបោះឆ្នោតសភា កាលពីឆ្នាំ ២០១៩។

លទ្ធផលផ្លូវការបានបង្ហាញថាគណបក្ស ANC ទទួលបានអាសនៈចំនួន ១៥៩ នៅក្នុងសភាដែលមាន ៤០០ អាសនៈ ធ្លាក់ចុះពី ២៣០ អាសនៈកាលពីពេលមុន។ លទ្ធផលមានន័យថាគណបក្ស ANC បច្ចុប្បន្ននេះ ត្រូវតែបែងចែកអំណាច ដែលទំនងជា ជាមួយគូប្រជែងនយោបាយធំមួយ។

លោក Ramaphosa បាននិយាយបន្ទាប់ពីគណៈកម្មាធិការរៀបចំការបោះឆ្នោត បានប្រកាសលទ្ធផលចុងក្រោយថា ប្រជាជនអាហ្វ្រិកខាងត្បូង រំពឹងថាគណបក្សដែលពួកគេបានបោះឆ្នោតឲ្យ នឹង ស្វែងរកចំណុចរួម ជម្នះលើភាពខ្វែងគំនិតរបស់ពួកគេ និងធ្វើសកម្មភាពរួមគ្នា ដើម្បីផលប្រយោជន៍របស់ប្រជាជនគ្រប់រូប។ លោកបានចាត់ទុកការបោះឆ្នោតថាជា «ជ័យជម្នះសម្រាប់លទ្ធិប្រជាធិបតេយ្យរបស់យើង»។

នៅពេលនេះ គណបក្សនយោបាយទាំងអស់ មានពេលពីរសប្តាហ៍ដើម្បីដោះស្រាយកិច្ចព្រមព្រៀងមួយ មុនពេលសភាថ្មីជ្រើសរើសប្រធាន ដែលទំនងជានៅតែទទួលការស្វាគមន៍ពីគណបក្ស ANC ។