នៅថ្ងៃទី៣ ខែមិថុនា ឆ្នាំ២០២៤នេះ ជាវេលាដែលរៀបចំពិធីថ្វាយព្រះភ្លើង ព្រះបរមសព សម្ដេច​ព្រះអគ្គ​មហា​សង្ឃរាជាធិបតីកិត្តិឧទ្ទេសបណ្ឌិត ទេព វង្ស សម្ដេចព្រះមហាសង្ឃរាជ នៃ​ព្រះរាជណា​ចក្រ​កម្ពុជា។ ជាវេលាចុងក្រោយនេះដែរ ព្រះវត្តមាន ព្រះមហាក្សត្រ ថ្នាក់ដឹកនាំ​រាជរដ្ឋាភិបាល ក៏ដូចជាវត្តមានប្រជាពលរដ្ឋ ពុទ្ធសាសនិក ចូលរួមនៅតាមដងផ្លូវ ដើម្បី​បង្ហាញ​ភាព​សោកស្ដាយ និងជូនដំណើរព្រះបរមសពជាលើកចុងក្រោយផងដែរ។

ឈានចូលមកដល់ ថ្ងៃទី ៣ ខែមិថុនា ឆ្នាំ ២០២៤ ជាវេលារៀបចំព្រះរាជពិធីថ្វាយព្រះភ្លើង និង​អភិសេក​ព្រះបរមអដ្ឋិ ព្រះបរមសព សម្ដេចព្រះអគ្គមហាសង្ឃរាជាធិបតីកិត្តិឧទ្ទេសបណ្ឌិត ទេព វង្ស សម្ដេចព្រះមហាសង្ឃរាជ នៃព្រះរាជណាចក្រកម្ពុជា។ ព្រះរាជ​ពិធី​បាន​ចាប់​ផ្ដើម​ចាប់​តាំង​ពី​នៅ​ម៉ោង ៤ ព្រឹក ដោយមានការជួបជុំព្រះសង្ឃ សិស្សគណ ក្រុមព្រះញាតិ និងពុទ្ធបរិស័ទ សូត្រធម៌ នមស្ការ ព្រះរតនត្រ័យ សមាទាននិច្ចសីល វន្ទាខមាទោសព្រះបរមសព។ រួច​បន្ត​ព្រះរាជ​ពិធី រំកិលព្រះមញ្ជូសា តម្កល់ព្រះទីនាំងនាគរាជ នៅម៉ោង ៥.00 ទើប​ឈាន​ដល់​ពិធីដង្ហែព្រះបរមសពចេញពីវត្តឧណ្ណាលោម ឆ្ពោះទៅកាន់ទីព្រះមេរុ មុខវត្តបទុមវតី នៅម៉ោង ៦.00 ព្រឹកនេះ។

សម្រាប់ពិធីដង្ហែក្បួនព្រះបរមសព ដែលប្រព្រឹត្តិទៅនាព្រឹកនេះ គឺមានការ​បិទ​នៅ​តាម​តម្រាយ​ផ្លូវ​ឆ្លង​កាត់ ដើម្បីសម្រួលដល់ក្បួនដង្ហែ។ ជាការបង្ហាញក្ដីគោរព ស្រឡាញ់ ប្រជាពលរដ្ឋ​ជា​ច្រើន​បាន​អញ្ជើញ​ចូលរួម ក្នុងការជូនដំណើរព្រះបរមសពជាលើកចុងក្រោយនេះផងដែរ។ បណ្ដា​ប្រជាពលរដ្ឋ និងពុទ្ធបរិស័ទ ស្ថិតក្នុងសម្លៀកបំពាក់ព័ណ៌ស បានចេញពីផ្ទះ តាំងពីប្រលប់ ដើម្បី​មក​ឈរ​នៅតាមតម្រាយផ្លូវ ជូនព្រះរាជដំណើរព្រះអង្គជាលលើកចុងក្រោយ។ ពលរដ្ឋ​នៅតែមា​ន​ភាព​សោកស្ដាយ ចំពោះការសោយទិវង្គតរបស់ព្រះអង្គ។

សូមជម្រាបថា សម្រាប់ពិធីថ្វាយព្រះភ្លើង ព្រះបរមសព សម្ដេច​ព្រះអគ្គ​មហា​សង្ឃរាជា​ធិបតី​កិត្តិ​ឧទ្ទេសបណ្ឌិត ទេព វង្ស សម្ដេចព្រះមហាសង្ឃរាជនៃព្រះរាជណាចក្រកម្ពុជា ព្រះករុណា​ព្រះបា​ទ​សម្ដេច​ព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ស្ដេចយាង​ថ្វាយ​ព្រះភ្លើងពីព្រះពន្លាជ័យផងដែរ។

សម្ដេចព្រះអគ្គមហាសង្ឃរាជាធិបតីកិត្តិឧទ្ទេសបណ្ឌិត ទេព វង្ស សម្ដេចព្រះមហាសង្ឃរាជ នៃ​ព្រះរាជាណាចក្រកម្ពុជា បានសោយទិវគ្គត នៅព្រះជន្មាយុ ៩៣ ព្រះវស្សា នៅថ្ងៃទី ២៦ ខែកុម្ភៈ ឆ្នាំ ២០២៤កន្លងទៅ។ ព្រះបរមសព ត្រូវបានតម្កល់ នៅវត្តឧណ្ណាលោម រហូតដល់​ពិធី​ថ្វាយ​ព្រះភ្លើង​ដែល​ប្រព្រឹត្តិទៅនៅថ្ងៃនេះ៕ អត្ថបទ៖ គឹមហុក