រាជរដ្ឋាភិបាលកម្ពុជា តាមរយៈក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ជា​សេនាធិការ បានចាប់ផ្ដើមរៀបចំ កិច្ចប្រជុំរដ្ឋមន្ត្រីអាស៊ានផ្នែកវិទ្យាសាស្ត្រ បច្ចេកវិទ្យា និង​នវានុវត្តន៍ លើកទី២០ និងកិច្ចប្រជុំគណៈកម្មាធិការអាស៊ានផ្នែកវិទ្យាសាស្ត្រ បច្ចេកវិទ្យា និង​នវានុវត្តន៍​ លើកទី៨៥ និងរួមនឹងកិច្ចប្រជុំពាក់ព័ន្ធមួយចំនួនទៀត ចាប់ពីថ្ងៃទី៣ដល់ថ្ងៃទី៧ ខែមិថុនា ឆ្នាំ២០២៤នេះនៅក្រុងសៀមរាប ខណៈសម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដី នៃ​កម្ពុជានឹងអញ្ជើញជាអធិបតីបើកកិច្ចប្រជុំនេះនៅថ្ងៃទី៧ ខែមិថុនាឆ្នាំ ២០២៤នេះ។

ឯកឧត្តមបណ្ឌិត ហ៊ុល សៀងហេង អនុរដ្ឋលេខាធិការ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានឱ្យដឹងថា កិច្ចប្រជុំនេះ​មាន​ការ​ចូលរួម​ពី​រដ្ឋមន្រ្ដី​នៃ​បណ្ដា​ប្រទេស​អាស៊ាន​ទាំង​១០ប្រទេស, ការចូលរួមពីអគ្គលេខាធិការអាស៊ាន, ក្នុងនោះកម្ពុជា​ក៏​បាន​អញ្ជើញ​ប្រទេស​ទីម័រខាងកើត ចូលរួមក្នុងនាមជាអ្នកសង្កេតការណ៍។ ក្រៅពីនេះក៏​មាន​ការ​ចូលរួ​ម​ពី​ប្រទេស​កូរ៉េ ជប៉ុន រួមនឹងបណ្ដាអង្គទូតនានានៅក្នុងប្រទេសកម្ពុជាចូលរួមផងដែរ។

ឯកឧត្តម​បន្តថាកិច្ចប្រជុំនេះនឹងធ្វើឡើងពេញមួយសប្ដាហ៍តែម្ដងដោយចាប់ផ្ដើមពីថ្ងៃទី៣ ដល់ថ្ងៃទី៧ ខែមិថុនា ឆ្នាំ២០២៤នេះនៅទីក្រុងសៀមរាប។ នៅថ្ងៃទី៣ ខែមិថុនានេះ គឺជាកិច្ច​ប្រជុំ​របស់អនុគណៈកម្មការហេដ្ឋារចនាសម្ព័ន្ធ និងាករអភិវឌ្ឍធនធានមនុស្ស ដែលជា​អនុ​គណៈកម្មការ​របស់គណកម្មាអាស៊ានសម្រាប់ផ្នែកវិទ្យាសាស្រ្ដ បច្ចេកវិទ្យា និងនវានុវត្តន៍។ កិច្ចប្រជុំ​របស់​អនុគណៈកម្មការនេះនឹងលើកជាគំនិតផ្គួចផ្ដើមផ្សេងៗ លើផ្នែកបញ្ញាសិប្បនិម្មិត (AI) និងបច្ចេកវិទ្យាពាក់ព័ន្ធផ្សេងៗដាក់ជូនគណៈប្រឹក្សាយោបល់របស់អាស៊ានដើម្បីអនុម័ត។ បន្ទាប់​មក កិច្ចប្រជុំនៅថ្ងៃទី៤-៥ ខែមិថុនា​របស់​គណៈកម្មការ​អាស៊ាន​នឹង​អនុម័ត​លើ​គំនិត​ផ្គួចផ្ដើម​ផ្សេងៗរបស់អនុគណៈកម្មការដែលបានស្នើឡើងមក។

សូមជម្រាបថា នៅឆ្នាំ២០២៤នេះ ជាលើកទីពីរហើយដែលកម្ពុជា ធ្វើជាម្ចាស់ផ្ទះដឹកនាំ កិច្ច​ប្រជុំ​រដ្ឋ​មន្ត្រី​អាស៊ានផ្នែកវិទ្យាសាស្ត្រ បច្ចេកវិទ្យា និងនវានុវត្តន៍លើកទី២០ និងកិច្ច​ប្រជុំ​គណៈ​កម្មាធិការ​អាស៊ានផ្នែកវិទ្យាសាស្ត្រ បច្ចេកវិទ្យា និងនវានុវត្តន៍លើកទី៨៥ និងរួមនឹងកិច្ចប្រជុំ​ពាក់​​ព័ន្ធ​។​ កិច្ចប្រជុំនេះបានធ្វើឡើងជារៀងរាល់មួយឆ្នាំម្ដង ដែលប្រទេស​ជា​សមាជិក​អាស៊ាន​ចែក​វេន​គ្នា​តាមលេខរៀងអក្សរអង់គ្លេស A. B. C. D ហើយនៅក្នុងឆ្នាំ ២០២៤នេះ គឺដល់វេន​ប្រទេស​កម្ពុជា​ធ្វើ​ជាម្ចាស់ផ្ទះទទួលបន្ទុកទទួល និងដឹកនាំកិច្ចប្រជុំ ខណៈកាលពីឆ្នាំ​មុន​ប្រទេស​ព្រុយ​ណេ​ជា​អ្នក​ដឹកនាំកិច្ចប្រជុំនេះ៕ អត្ថបទ៖ វ៉ន ដារ៉ា