ភ្នំពេញ៖ កម្មវិធីជជែកដេញដោលយុវជនថ្នាក់ជាតិ របស់ក្រសួងអប់រំ យុវជន និងកីឡា កំពុងបណ្ដុះគំនិតដល់សិស្សានុសិស្ស ឲ្យចេះធ្វើការសិក្សាស្រាវជ្រាវ នូវចំណេះដឹងផ្សេងៗ ដែលសុទ្ធសឹងតែអាចជួយផ្ដល់ប្រយោជន៍ ដល់ការអភិវឌ្ឍជាតិ ហើយក៏ធ្វើឲ្យពួកគេក្លាយខ្លួនជាយុវជនគំរូល្អ សម្រាប់សង្គមជាតិផងដែរ ។
ក្នុងពិធីប្រកួតជម្រុះវគ្គទី៣ នៃកម្មវិធី “ជជែកដេញដោលយុវជនថ្នាក់ជាតិ ឆ្នាំ២០២៤” នា មជ្ឈមណ្ឌលម៉ានី KAMPUS រាជធានីភ្នំពេញ នៅថ្ងៃទី២ ខែមិថុនា ឆ្នាំ២០២៤ លោក ម៉ិល ផនសីហា ប្រធានយកដ្ឋានយុវជន នៃក្រសួងអប់រំ យុវជន និងកីឡា បានឲ្យដឹងថា កម្មវិធីជជែកដេញដោលយុវជនថ្នាក់ជាតិ ត្រូវបានរៀបចំឡើងក្នុងគោលបំណងផ្តល់នូវ “វេទិកាសម្តែងមតិ” និង “សង្វៀនវោហាសព្ទ” ដើម្បីបណ្តុះបណ្តាលសមត្ថភាពយុវជនកម្ពុជា លើបំណិនសតវត្សរ៍ទី២១ ពោលគឺពង្រឹងបំណិនស្រាវជ្រាវ បំណិនត្រឹះរឹះពិចារណា នវានុវត្តន៍ ការនិយាយជាសាធារណៈ មូលដ្ឋានចំណេះដឹង ឌីជីថល ការដោះស្រាយបញ្ហា ការធ្វើការងារជាក្រុម ការប្រាស្រ័យទាក់ទងប្រកបដោយសន្តិសហវិជ្ជមាន ដើម្បីក្លាយខ្លួនជាពលរដ្ឋល្អ ដែលមានទំនួលខុសត្រូវក្នុងសង្គមជាតិ ។
លោកបន្តថា នេះជារដូវកាលទី៥ នៃកម្មវិធីជជែកដេញដោលយុវជនថ្នាក់ជាតិ ហើយ ក្នុងឆ្នាំ២០២៤នេះ វិទ្យាល័យរដ្ឋ និងឯកជន ចំនួន៣២ មកពីរាជធានី ៨ក្រុម និងខេត្តទាំង២៤ (១ខេត្ត ១ក្រុម) មានបេក្ខជនសរុប ១៦០នាក់ គ្រូដឹកនាំ ៣២នាក់ គ្រូបង្វឹក ៣២នាក់ ត្រូវបានជ្រើសរើសឱ្យចូលរួមក្នុងកម្មវិធី “ជជែកដេញដោលយុវជនថ្នាក់ជាតិ ឆ្នាំ២០២៤” ហើយវគ្គទី៣នេះ មានចំនួនគូប្រកួតចំនួន៤ ។
សម្រាប់យុវជនមកពីសាលារដ្ឋ និងឯកជន ដែលបានចូលរួមប្រកួត និងឈានមកដល់វគ្គទី៣នេះ បានលើកឡើងថា ពួកគេពិតជាមានការសប្បាយរីករាយ និងថ្លែងអំណរគុណយ៉ាងខ្លាំង ដល់ក្រសួងអប់រំ យុវជន និងកីឡា ក៏ដូចជាអ្នកពាក់ពន្ធ ដែលបានរៀបចំកម្មវិធីនេះឡើង ដែលបានជួយជំរុញ ដល់ពួកគេឲ្យចេះសិក្សាស្រាវជ្រាវពីមេរៀន និងចំណេះដឹងផ្សេងៗ បានច្រើនជាងមុន និងមានភាពជឿជាក់ ព្រោះរាល់ចំណេះដឹង ដែលបានរកឃើញត្រូវយកមកធ្វើបទបង្ហាញ ជជែកវែកញែកជូនថ្នាក់ដឹកនាំ ឬគណៈកម្មការ ដែលនេះជាការលើកទឹកចិត្តដល់យុវជន ឲ្យខិតខំរៀនសូត្រ។
ឯកឧត្តម ស៊ាន បូរ៉ាត រដ្ឋលេខាធិការក្រសួងអប់រំ យុវជន និងកីឡា មានប្រសាសន៍ថា យុវជនជាសសរទ្រូងរបស់ប្រទេសជាតិនៅថ្ងៃអនាគត យុវជនជាកម្លាំងបន្តវេនប្រកបដោយសក្ដានុពលក្នុងការអភិវឌ្ឍសេដ្ឋកិច្ចជាតិ និងយុវជនជាអ្នកថែរក្សាការពារ រាល់សមិទ្ធផលសង្គមជាតិ ហើយសមត្ថភាព ការច្នៃប្រឌិត ការចូលរួម និងភាពរឹងមាំរបស់យុវជនកម្ពុជា តំណាងឱ្យអនាគតដ៏រុងរឿងរបស់កម្ពុជា។
ឯកឧត្តមបានបន្ថែមថា ក្រសួងអប់រំ យុវជន និងកីឡា ជាសេនាធិការឱ្យរាជរដ្ឋាភិបាលក្នុងការកសាងធនធានមនុស្ស ស្របតាមចតុស្តម្ភទាំង៤នៃវិស័យអប់រំ រួមមាន៖ រៀនដើម្បីដឹង រៀនដើម្បីធ្វើ រៀនដើម្បីរស់នៅ រៀនដើម្បីទាំងអស់គ្នា ។ នេះជាបេសកកម្មយ៉ាងសំខាន់របស់ក្រសួងសម្រាប់អភិវឌ្ឍយុវជនប្រកបដោយចំណេះដឹង ចំណេះធ្វើ ទំនាក់ទំនងល្អ និងការចេះរស់នៅជាមួយគ្នា ប្រកបដោយស្មារតីទទួលខុសត្រូវ មានសីលធម៌ និងមានភាពថ្លៃថ្នូរក្នុងសង្គមជាតិ ។
គួរបញ្ជាក់ថា ការប្រកួតវគ្គផ្តាច់ព្រ័ត្រ គឺជ្រើសយកបេក្ខជនចំនួន ២ក្រុម ប្រកួតដណ្តើមយកជ័យលាភី លេខ១ និងលេខ២ ដែលនឹងប្រព្រឹត្តទៅនៅថ្ងៃទី១២ ខែសីហា ឆ្នាំ២០២៤ ហើយបេក្ខជនត្រូវប្រកួតដោយផ្ទាល់៕ អត្ថបទ បាន សុខរិទ្ធិ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
