ក្រុមមន្ត្រីបាននិយាយថា ភ្លើងឆេះស្មៅកំពុងរាលដាលកាន់តែខ្លាំង ដែលបានចាប់ផ្តើមកាលពីរសៀលថ្ងៃសៅរ៍នៅក្នុងស្រុកសាន់ចូឃ្វីន (San Joaquin) រដ្ឋ កាលីហ្វ័រញ៉ា បានបំផ្លិចបំផ្លាញផ្ទៃដី ១៤.០០០ ហិចតា ដោយបង្ខំឱ្យអ្នកស្រុកនៅក្នុងផ្លូវរបស់អណ្ដាតភ្លើងនេះ ជម្លៀសចេញពីតំបន់នោះ។

យោងតាមមន្ទីរព្រៃឈើ និងទប់ស្កាត់អគ្គិភ័យប្រចាំរដ្ឋកាលីហ្វ័រនីញ៉ា បានឱ្យដឹងថា ចំហេះព្រៃ មានឈ្មោះថា ខូរ៉ល (Corral) បានចាប់ផ្តើមឆាបឆេះនៅក្នុងទីក្រុង ត្រាស៊ី (Tracy)ប្រហែលម៉ោង២:៣០នាទីរសៀល។ មន្ទីរនេះបាននិយាយថា គិតត្រឹមរសៀលថ្ងៃអាទិត្យ អណ្តាតភ្លើងបានរលត់អស់ ៣០% ហើយបានបាននិយាយថា មូលហេតុបណ្ដាលឲ្យមានភ្លើងឆាបឆេះនេះ កំពុងស្ថិតនៅក្រោមការស៊ើបអង្កេត ។

នាពេលថ្មីៗនេះ ក្រុមមន្ត្រីប្រចាំតំបន់បានព្រមានថា ខ្យល់បក់បោកខ្លាំង សីតុណ្ហភាពកាន់តែក្តៅ និងស្មៅស្ងួត អាចបង្កើតលក្ខខណ្ឌអំណោយផលកាន់តែងាយស្រួលបង្កឲ្យមានភ្លើងឆាបឆេះ។

ក្រុមអាជ្ញាធរក្នុងស្រុក សាន់ចូឃ្វីន បាននិយាយកាលពីថ្ងៃសៅរ៍ថា តំបន់ភាគខាងលិចនៃអាងស្តុកទឹករដ្ឋកាលីហ្វ័រញ៉ា ភាគខាងត្បូងនៃតំបន់ជ្រោះ ខូរ៉ល ហូឡូ គ្រីក (Corral Hollow Creek) ចាប់ពីភាគខាងលិចទៅដល់ស្រុកអាម៉េដា (Alameda) និងចាប់ពីភាគខាងត្បូងទៅដល់ស្រុក ស្តានីស្លូស (Stanislaus) គួរតែចាកចេញឥឡូវនេះ។

កាលពីយប់ថ្ងៃសៅរ៍ មន្ត្រីស្រុក សាន់ចូឃ្វីន បានណែនាំអ្នកក្រុងត្រាស៊ី ដែលនៅជិតបំផុតទីតាំងចំហេះព្រៃនេះ ឱ្យជម្លៀសចេញពីលំនៅឋាន ហើយប្រាប់អ្នកផ្សេងទៀតនៅក្បែរនោះថា ពួកគេ គួរតែត្រៀមខ្លួន ចាកចេញពីតំបន់គ្រោះថ្នាក់ ។ ទីតាំងជម្លៀសបណ្តោះអាសន្នត្រូវ បានបង្កើតឡើងនៅមជ្ឈមណ្ឌលសហគមន៍ ឡាច ក្លូវើ (Larch Clover) សម្រាប់ប្រជាជនដែលរងផលប៉ះពាល់៕