ទីភ្នាក់ងារការពារជនស៊ីវិលរបស់រដ្ឋ បាននិយាយថា មនុស្សសរុបចំនួន១៧១នាក់ បានស្លាប់ដោយសារគ្រោះមហន្តរាយអាកាសធាតុដ៏អាក្រក់បំផុតនៅប្រទេសប្រេស៊ីលភាគខាងត្បូង ជាកំណត់ត្រាខ្ពស់នៅក្នុងរដ្ឋ រីអូ ហ្គ្រែនដេ ដូ ស៊ូល(Rio Grande do Sul) ។ ទីភ្នាក់ងារ និយាយថា ករណីនៃជំងឺបង្កឡើងដោយទឹកកខ្វក់ ក៏កំពុងកើនឡើងផងដែរ។

យោងតាមទីភ្នាក់ងារបានឱ្យដឹងថា ចាប់តាំងពីថ្ងៃទី២៩ ខែមេសា ទឹកជំនន់ដែលបណ្តាលមកពីភ្លៀងធ្លាក់ និងទឹកទន្លេកើនឡើង បានធ្វើឲ្យប៉ះពាល់ដល់មនុស្សចំនួន ២,៣៩លាននាក់ និងអ្នកបាត់ខ្លួនចំនួន៤៣នាក់ ហើយមនុស្ស៦១៧.៩០០នាក់ ត្រូវបានជម្លៀសចេញពីលំនៅឋានដែលត្រូវបានបំផ្លាញ ឬត្រូវទឹកជន់លិច។

ទីក្រុងជាច្រើនដែលរងផលប៉ះពាល់ បានធូរស្រាលវិញកាលពីសប្តាហ៍មុន ដោយសារអាកាសធាតុរាំងស្ងួត ដែលអនុញ្ញាតឱ្យមានការជួយសង្គ្រោះ និងការកសាងឡើងវិញ ព្រមទាំងមានការចាប់ផ្តើមការផ្តល់ប្រាក់ឧបត្ថម្ភ ដល់ប្រជាជនរងផលប៉ះពាល់ រៀបចំដោយរដ្ឋាភិបាល។

សោកនាដកម្មអាកាសធាតុ បានធ្វើឲ្យប៉ះពាល់ដល់ក្រុងចំនួន៤៧៥ ក្នុងចំណោមក្រុងចំនួន៤៩៧ ក្នុងរដ្ឋ Rio Grande do Sul ដែលជាមជ្ឈមណ្ឌលកសិកម្មដ៏សំខាន់ នៅក្នុងប្រទេសប្រេស៊ីល ជាប្រទេសផលិតអង្ករកំពូលមួយ នៅអាមេរិកឡាទីន។